“Реал”нинг муҳим ҳимоячиси “Сити” билан ўйин олдидан сафга қайтди

“Реал Мадрид”нинг асосий марказий ҳимоячиси Антонио Рюдигер жароҳатидан сўнг асосий гуруҳ билан машғулотларга қайтди ва мураббийлар штаби тез орада уни майдонга тушириши мумкин. Бу ҳақда “Relevo” хабар берди.

Манбага кўра, Рюдигер катта эҳтимол билан “Манчестер Сити”га қарши бўлиб ўтадиган Европа Чемпионлар лигаси ўйинида асосий таркибда майдонга тушади. Клуб тиббий штаби ҳали якуний қарорга келгани йўқ, аммо немис футболчисининг тикланишининг ижобий динамикаси унинг тўлиқ тайёр бўлишидан далолат бермоқда.

Бугун,18 февраль куни “Реал Мадрид” “Сити”га қарши ўйин олдидан сўнгги машғулотини ўтказади ва шундан кейин шифокорлар якуний қарорни қабул қилади.

“Этиҳад”да бўлиб ўтган “Реал” ва “Манчестер Сити” ўртасидаги биринчи учрашув Карло Анчелотти шогирдларининг 3:2 ҳисобидаги ғалабаси билан якунланган эди.

Эслатиб ўтамиз, аввалроқ “Реал” ва “Сити” ўйинига ким ҳакамлик қилиши хабар қилинганди.