ЕЧЛ. “Атлетико” ва “Сити” учрашуви катта муштлашув билан якунланди (видео)

“Атлетико” ва “Манчестер Сити” (0-1; 0-0) ўртасидаги Европа Чемпионлар лигасининг чорак финал жавоб учрашуви муштлашув билан тугади. Бу ҳақда "Маrcа" нашри хабар берди.

"Атлетико Мадрид" ва "Манчестер Сити" ўртасидаги Чемпионлар лигасининг чорак финал баҳсига ҳакам томонидан қўшиб берилган вақт 12 дақиқа давом этган. Фил Фоденга қарши қўполлик учун Фелипе Монтейро майдондан четлатилди. Шунингдек, икки жамоа ўртасида катта муштлашув содир бўлди. Натижада, Стефан Савич ва Натан Аке огоҳлантирилди.

Майдон ташқарисидаги Фоден вақтни беҳуда ўтказиш учун ўйинга қайтди. Савич уни пайқаб қолди ва югуриб бориб, ўз қўллари билан Фоденни орқага судраб кетди. Шундан сўнг, катта жанжал бошланди.

Ҳакам карточкаларни беришдан олдин футболчиларнинг ажралишини кутди. Фоденни тепган Фелипега қизил, Жек Грилиш ва Акенинг сочидан тортиб олган Савичга сариқ кўрсатилди.

Муштлашув якунланиб, ҳуштак чалинганидан кейин ҳам тартибсизлик давом этди. “Сити” футболчилари сўнгги дақиқаларда вақт чўзиш учун ерга йиқилишда давом этишди. Натижада, Диего Симеоне Пеп Гвардиоланинг захира ўриндиғини киноя билан олқишлаб, “Estadio Wanda Metropolitano”ни “ёндириб” юборди. Бунинг ортидан, Савич, Марио Эрмосо ва Берта “шаҳарликлар” футболчилари билан яна бир бор тўқнаш келишди. Жанжал давом этгач, UЕFА полициядан аралашишни сўраган.

Маълумот ўрнида, кеча, 13 апрель куни ЕЧЛ чорак финал баҳсларига якун ясалди. “Атлетико” ўз майдонида “Манчестер Сити”ни қабул қилди. Ушбу баҳсда ҳисоб очилмаган бўлса-да, дастлабки ўйиндаги ғалаба эвазига “Манчестер Сити” ярим финалга йўл олди. “Шаҳарликлар”нинг ярим финалдаги рақиби Мадриднинг “Реал” клуби бўлади. Улар ўртасидаги биринчи учрашув жорий йилнинг 26 апрель санасига белгиланган.

Шунингдек, жавоб учрашувида “Бенфика” билан жанговар 3-3 ҳисобида дурранг қайд этган “Ливерпуль” ҳам ярим финалга йўл олди. “Қизиллар” ярим финалда Испаниянинг бошқа бир жамоаси “Вильярреал” билан кураш олиб боради. Улар ўртасидаги дастлабки учрашув 25 апрель куни бўлиб ўтади.

Маъруф Абдумаликов