“Real” Kamavinga va Valverde uchun takliflarni ko‘rib chiqmoqchi

“Real Madrid” yarim himoyachilari Eduardo Kamavinga va Federiko Valverde bo‘yicha takliflarni ko‘rib chiqishga tayyor. Bu haqda “Footmercato” nashri xabar berdi. 

Manba ma’lumotiga ko‘ra, madridliklar Kamavinga uchun kamida 50 million yevro talab qilmoqda. Fransiyalik futbolchi 2021 yilda “Renn”dan 30 million yevro evaziga jamoa safiga qo‘shilgan edi. Uning amaldagi shartnomasi 2029 yilgacha mo‘ljallangan. Klub rahbariyati ayniqsa Angliya Premer-ligasi jamoalaridan qiziqish bo‘lishini kutmoqda.

Shuningdek, “Real Madrid” Federiko Valverde transferi uchun 100 million yevro atrofida mablag‘ olishni rejalashtirmoqda. Nashrning yozishicha, urugvaylik futbolchining ehtimoliy ketishi faqat sport natijalari bilan emas, balki jamoa ichidagi ayrim muammolar bilan ham bog‘liq bo‘lishi mumkin.

Avvalroq, ommaviy axborot vositalarida Valverde va Orelen Chuameni o‘rtasida kelishmovchilik yuzaga kelgani haqida xabarlar tarqalgan edi. Shu bilan birga, o‘tgan mavsumdagi omadsiz natijalardan keyin “Real Madrid”da katta o‘zgarishlar kutilayotgani ta’kidlanmoqda.

Ma’lumot uchun, “Real Madrid” o‘tgan mavsumni sovrinsiz yakunladi.