“Реал” Холандни қандай сотиб олмоқчилиги маълум бўлди

Испаниянинг “Реал Мадрид” клуби 2 йилдан сўнг “Манчестер Сити” ҳужумчиси Эрлинг Холандни сотиб олишга ҳаракат қилади. Бу ҳақда “Аs” нашри ёзмоқда.

Манбага кўра, мадридликлар "шаҳарликлар" устози Пеп Гвардиоланинг Холанднинг шартномасида "Реал"га ўтиш банди йўқлигини эълон қилганидан хавотирда эмас.

Мадрид клубида норвегиялик футболчини 2 йилдан кейин 180 миллион еврога сотиб олиш мумкинлиги ҳақида маълумот бор.

"Реал Мадрид"нинг режасига кўра, Холанд билан алоқа 2024 тикланади ва айнан ўша йили Карим Бенземанинг “лос бланкос” билан шартномаси тугайди. Эрлинг Холанд франциялик ҳужумчининг ўрнини эгаллаши кутилмоқда.

"Реал Мадрид" футболчини Мадриддаги ҳаёт Манчестердагидан яхшироқ эканлигига, шунингдек, "қироллик" клубида ўйнаш обрўлироқ ва мартаба учун фойдалироқ эканлигига ишонтирмоқчи.

Маълумот учун, жорий мавсум Эрлинг Холанд “Сити” сафида 12 та учрашувда майдонга тушиб, 19 та гол урди. “Тransfermarkt” портали норвегиялик ҳужумчини 150 миллион еврога баҳоламоқда.