Раҳбарият ЖЧни кўрган мутахассисни олиб келиш ниятида – Кападзе

Ўзбекистон миллий терма жамоаси бош мураббийси Темур Кападзе МТЖга бош мурабиий бўлиши айтилаётган Пауло Бенту ҳақида гапирди. Бу ҳақда у бугун, 29 август куни CAFA Nations Cup-2025 турнири олдидан бўлиб ўтган матбуот анжуманида сўз очди.

“Биз машғулотдамиз. Мураббий келганини кўрдик. Келишув бўлгани ҳақида хабаримиз йўқ. Бу терма жамоа, биз ватан жамоаси учун энг яхшиси бўлишини тилаймиз. Бу жамоани ким бошқаришидан қаътий назар Ўзбекистон терма жамоаси учун мухлислик қиламиз. Мен ҳақимда илиқ фикрлар билдирганларга миннатдорлик билдираман. Барчага раҳмат айтаман”, дейди Кападзе.

Шунингдек, у раҳбарият тажрибали ва Жаҳон чемпионатини кўрган мутахассисни олиб келиш ниятида эканини ҳам айтган. 

“Ўйлайманки, бу балки яхшиликка. Биз ҳам доим ватанимиз термаси учун ёрдам берамиз. Раҳбарият қандай қарор қабул қилса, биз буни қўллаб турамиз.  Биз мураббийга эмас, терма жамоага мухлислик қиламиз.  Биз биринчи марта Жаҳон чемпионатига чиқдик. Вақт оз қолди ва бу турнирга яхши ҳолатда боришимиз лозим. Ким бўлишидан қатъий назар, терма жамоага фойдамиз тегса, хурсанд бўламиз”, дейди Кападзе.

Эслатиб ўтамиз, аввалроқ, португалиялик 56 ёшли мутахассис Паулу Бенту Ўзбекистон миллий терма жамоасини бошқариши кутилаётгани хабар қилинган эди. Кеча, 28 август куни эса ижтимоий тармоқларда унинг Тошкентга етиб келгани ва тез орда Миллий терма жамоа бош мураббийи сифатида эълон қилиниши ҳақида хабарлар тарқалди.