Рамзан Қодиров оммага ҳассага таянган ҳолда кўриниш берди (видео)

Чеченистон раҳбари Рамзан Қодиров жамоатчилик олдида қўлида ҳасса билан кўринди. Бу ҳақдаги видеони республика етакчиси кеча, 3 январь куни ўзининг Telegram-каналида эълон қилди.

Қодиров ҳасса билан Ачхой-Мартон туманидаги Янги Шарой қишлоғида жойлашган мактабнинг очилиш маросимига борган.

“Янги ҳафизлар мактаби республикада ўн биринчиси бўлди. У Россия Қаҳрамони Ахмат-Ҳожи Қодиров номидаги Минтақавий жамоат фонди маблағлари ҳисобидан барпо этилди”, деб ёзди у.

Эслатиб ўтамиз, Рамзан Қодиров 2025 йил 24 декабрдан 25 декабрга ўтар кечаси Москвада шошилинч тарзда шифохонага ётқизилгани ҳақида хабар берилган эди.  Қодиров Россия Президенти Владимир Путин раислигида ўтказилиши керак бўлган Давлат кенгаши йиғилишида иштирок этиш учун пойтахтга борган. Бироқ унинг соғлиғи кескин ёмонлашган ва у реанимобил орқали Россия Президенти ишлар бошқармасига қарашли Марказий клиник шифохонага етказилган. Бундай ҳолат учун захира режа кўзда тутилмагани сабабли, Давлат кенгаши Чеченистон вакилисиз ўтказилган.