Раҳмонов UFC камари учун жанг қилиш имкониятини йўқотмади

UFC президенти Дана Уайт Шавкат Раҳмонов чемпионлик жанги учун даъвогар мақомини йўқотмаганини маълум қилди.

Раҳмонов жароҳати сабаб ярим ўрта вазн тоифасидаги UFC чемпионлик жангидан бош тортди.

“Биз бир неча бор Шавкат Раҳмонов ва Билол Муҳаммад ўртасида жанг ташкил қилишга ҳаракат қилдик. Лекин ҳозир Шавкат жароҳат олди. Аммо Раҳмонов тузалгач, у қайтади ва Билол-Маддалена жанги ғолибига қарши жанг қилиш учун биринчи номзод  бўлиши аниқ”, дейди Уайт.

Қайд этиш жоиз, қозоғистонлик жангчи 10 май куни ўтказиладиган UFC 315 турнири доирасида чемпионлик жангини ўтказиши керак эди, бироқ у жароҳат олди.

Маълумот ўрнида, Шавкат Раҳмонов профессионал карьерасида 19 та жанг ўтказган ва барчасида ғалаба қозонган. Сўнгги бор у 2024 йилнинг 7 декабрида ирландиялик Ян Гаррига қарши октагонга кўтарилган ва очколар ҳисобига кўра ғалаба қозонган.