Путиннинг АҚШга ташрифи ҳурмат белгисидир – Трамп

Оқ уй раҳбари Дональд Трамп Россия Президенти Владимир Путиннинг АҚШга ташрифи ҳурмат ифодаси эканини айтди. Бу ҳақда у кеча, 11 август куни Оқ уйда бўлиб ўтган матбуот анжуманида сўз очди.

Трампнинг сўзларига кўра, бўладиган учрашувнинг асосий мақсади – Украинадаги можарони тўхтатиш. Бу учрашув дастлабки босқич бўлиб, келгусида келишув тузиш имкониятини аниқлашга хизмат қилади. Шунингдек, АҚШ Президенти Путин ва Зеленский ўртасида учрашув ташаббусини илгари сурмоқчи.

“Путиннинг келишувга тайёр ёки йўқлигини билиб олишим учун икки дақиқа етарли. Кейин мен Зеленскийга қўнғироқ қиламан. Аляскада у бўлмайди – у шундоқ ҳам жуда кўп учрашувларда бўлди ва бу ҳеч қандай натижа бермади. Путин фақат мен билан гаплашади. Мен унинг кўнглидагини билиб оламан ва агар бу тўғри келишув бўладиган бўлса, унинг шартларини европаликлар ва украинларга етказаман. Кейин эса Зеленский ва Путин учрашади мен билан ёки менинг иштирокимсиз. Катта эҳтимол билан бизни ҳудудий алмашув кутмоқда”, деган АҚШ Президенти.

Россия ва АҚШ раҳбарларининг саммити жорий йилнинг 15 августида АҚШнинг Аляска штатида ўтказилиши режалаштирилган. Музокараларда Украинада барқарор тинчликка эришиш йўллари муҳокама қилинади. Россия томони кейинги учрашувни бевосита Россияда ўтказишга умид билдирмоқда ва бу таклиф аллақачон АҚШ Президентига етказилган.

ОАВга кўра, Путин билан учрашувдан икки кун олдин, 13 августда Трамп Владимир Зеленский билан телефон орқали мулоқот ўтказади. Унда Европа давлатлари вакиллари ҳам иштирок этиши кутилмоқда. 

Эслатиб ўтамиз, аввалроқ Трамп Владимир Зеленский “бирор нарсани имзолаши” кераклиги ва унга тайёр туриши шартлигини айтганди. Трампнинг таъкидлашича, Владимир Путин ҳам, Зеленский ҳам “тинчликни кўришни” хоҳлайди.