Путиннинг 9 майдаги сулҳ ғояси манипуляциядир – Зеленский

Украина Президенти Владимир Зеленский Украина урушни тугатиш учун “барча ҳамкорлар билан ишлашга” тайёрлигини, бироқ Россия ҳамма нарсани рад этиб, “дунёни манипуляция қилиб, АҚШни алдашга уринаётганини” айтди. Бу ҳақда у кеча, 29 апрель куни кечки мурожаатида сўз очди.

Зеленский Россия Президенти Владимир Путиннинг Россияда Иккинчи жаҳон урушида Германия устидан қозонилган ғалабанинг 80 йиллиги нишонланиши муносабати билан Украинада 8 майдан 10 май ярим тунгача давом этиши керак бўлган уч кунлик “сулҳ” ҳақидаги баёнотларини шундай изоҳлади.

“Энди манипуляцияга яна бир уриниш бўлди: негадир ҳамма 8 майгача кутиши ва шундан кейингина парад пайтида Путинга сукут сақлаш учун ўт очишни тўхтатиш керак.
Биз парадларни эмас, одамларнинг ҳаётини қадрлаймиз.

Шунинг учун биз ишонамиз - дунё ишонади - 8 майни кутишга ҳеч қандай сабаб йўқ. Ва ўт очиш улар яна ўлдиришни бошлаши мумкин бўлмаслиги учун бир неча кундан ортиқ тўхташи керак. Дарҳол, тўлиқ ва сўзсиз ўт очишни тўхтатиш – ва камида 30 кун, бу кафолатланган ва хавфсиз бўлиши учун”, деди Зеленский.

Ўша мурожаатида Украина раҳбари Черкас вилоятида дрон ҳужумидан кейин газ таъминотини тиклашга ҳаракат қилаётганини айтди. Унинг сўзларига кўра, “дунёнинг Россияга сукунат ўрнатиш талаблари фонида” Россия Федерацияси яна “уруш ҳақида эмас, балки одамлар ҳақида бўлган объектга” зарба берган.

Аввалроқ Украина Ташқи ишлар вазирлиги ҳам Путиннинг баёнотларига худди шундай жавоб қайтарган эди. 

“Агар Россия ҳақиқатан ҳам тинчликни хоҳласа, дарҳол ўт очиш тўхташи керак”, деган ТИВ раҳбари Андрей Сибига.

Унинг сўзларига кўра, 8 майни кутишнинг ҳожати йўқ, “агар ҳозир исталган санадан бошлаб ва 30 кун давомида ўт очишни тўхтатиш мумкин бўлса, бу шунчаки парад учун эмас, балки ҳақиқий оташкесим бўлиши учун бўларди”.

“Украина узоқ муддатли, ишончли ва тўлиқ ўт очишни тўхтатишни қўллаб-қувватлашга тайёр. Ва биз буни доимий равишда таклиф қиламиз - камида 30 кун”, деб таъкидлади Сибига.

Вашингтон ҳам Путиннинг таклифига нисбатан иштиёқсиз фикрларни билдирди. 

“АҚШ Президенти Дональд Трамп Украинада вақтинчалик эмас, доимий ўт очишни тўхтатишни истайди”, деди Оқ уй матбуот котиби Кэролайн Ливитт.

Эслатиб ўтамиз, аввалроқ Путин Украинада 8-10 май кунлари бир томонлама равишда ўт очишни тўхтатишни эълон қилган ва бу қарорга Иккинчи жаҳон урушида Германия устидан қозонилган ғалабанинг 80 йиллиги ва “гуманитар мулоҳазалар” сабаб қилиб кўрсатган эди.

Кремль Киевни “бундан ўрнак олишга” чақирди ва ўт очишни тўхтатиш режими бузилган тақдирда “адекват ва самарали жавоб” билан таҳдид қилди.

Украинага қарши тўртинчи йилдан бери уруш олиб бораётган Россия охирги марта Пасха байрамларида – 19-21 апрель кунлари бир томонлама сулҳ эълон қилган эди.