Путин Трампнинг ультиматумини эътиборсиз қолдирди

Россия Президенти Владимир Путин АҚШ Президенти Дональд Трампнинг Украинада ўт очишни тўхтатиш бўйича 8 август куни тугайдиган ультиматумини эътиборсиз қолдиради. Бу ҳақда бугун, 5 август куни Кремлга яқин бўлган учта манбага таяниб, “Reuters” агентлиги  хабар берди.

“Путин урушда ғалаба қозонишига ишончи комил ва АҚШнинг янги санкциялари Россияга кучли таъсир кўрсатмайди”, дейди агентлик манбалари. 

Улардан бирига кўра, Путиннинг мақсади Украинанинг тўртта вилояти: Донецк, Луганск, Запорожье ва Херсонни тўлиқ қўлга киритиш. Шундан кейингина у тинчлик келишувини муҳокама қилади.

“Россия ва Украина ўртасида давом этаётган музокаралар моҳиятан мазмундан йироқ ва фақатгина Трампга Москва тинчликка қарши эмаслигини билдириш учун”, деб ёзади агентлик.

“Reuters” агентлигининг икки манбасига кўра, Путин “Трампни ғазаблантирмоқчи эмас ва у Вашингтон ва Ғарб билан муносабатларни яхшилаш имкониятини қўлдан бой бераётганини тушунади, аммо унинг ҳарбий мақсадлари муҳимроқ”. Россия Бош штаби Путинга Украина фронти икки-уч ой ичида қулашини айтган.

Трамп бир кун аввал АҚШ махсус вакили Стивен Уиткофф 6 ёки 7 август кунлари Россия раҳбарияти билан музокаралар ўтказиш учун Россияга ташриф буюришини маълум қилган эди. Агар Россия Украинада тинчлик ўрнатишдан бош тортса нима бўлади деган саволга Трамп шундай жавоб берди:

“Хўш, санкциялар бўлади. Лекин улар топқир ва улар санкцияларни айланиб ўтишда жуда яхши. Шундай экан, нима бўлишини кўрамиз”.

14 июль куни Оқ уйда НАТО Бош котиби Марк Рютте билан музокаралар чоғида Трамп агар яқин 50 кун ичида (2 сентябргача) Украинада тинчлик ўрнатиш бўйича келишувга эришилмаса, АҚШ расмийлари Россиянинг савдо ҳамкорларига нисбатан 100 фоизлик иккиламчи божлар жорий этишини айтди. 29 июль куни у бу муддатни 10 кунга қисқартирди.