Путин тинчликни хоҳламайди – Зеленский

Москванинг Украинадаги тинчлик музокараларидан асосий мақсади тинчликка эришиш эмас, балки АҚШ Президенти Дональд Трампга “Украина ва Россия ўртасида дипломатик кўприк борлигини” кўрсатиш ва АҚШнинг Россия Федерациясига қарши янги санкцияларини жорий этишдан қочишдир. Бу фикрни Украина Президенти Владимир Зеленский бугун, 12 июнь куни чоп этилган Германиянинг “Bild” таблоидига берган интервьюсида билдирди.

“Путин ҳар доим шундай дейиши мумкин: “Биз бир-биримиз билан гаплашамиз! Санкциялар қўлланилса, бошқа музокаралар бўлмайди”, дейди Зеленский.

Ҳужумга учраган мамлакат Президенти айни пайтда Кремль Украинани яккалаб қўйиш мақсадини кўзламоқда, деб ҳисоблайди .

“Украина ҳамкорлари ёрдамисиз узоқ давом этадиган уруш Путин учун идеал вариант бўлади. У шериклар ва санкциялар кўмагида узоқ давом этадиган урушга дош бера олмайди”, дейди Президент Зеленский.

Шу муносабат билан у Ғарбнинг Москвага қарши санкцияларини кучайтиришга чақирди.

АҚШ Президенти Дональд Трампнинг уни танқид қилганини изоҳлар экан, Владимир Зеленский “агар бу бизни (украиналикларни) уруш якунига яқинлаштирса, ҳамма нарсани нормал қабул қилишга тайёр”лигини айтди.

“Президент Трамп ўз тактикасини танлади. Мен ҳеч кимни қораламоқчи эмасман”, деди у.

Билд журналисти Пол Ронсгеймер Оқ уйда Трамп билан жанжалдан кейин Зеленский Америка Президентини танқид қилишдан қочганига эътибор қаратганида, Украина раҳбари шундай деди:

“Менимча, унинг учун (Дональд Трамп), тарихий нуқтаи назардан қараганда, дунёда тинчликни тиклашдан муҳимроқ нарса бўлиши мумкин эмас”.

Россиянинг бир нечта стратегик бомбардимончи самолётлари ва унинг ҳарбий аэродромлари зарар кўрган “Ўргимчак тўри” операцияси ҳақида гапирар экан, Зеленский, унинг фикрича, Россиянинг яқинда Киев ва Украинанинг бошқа шаҳарларига учувчисиз самолётлар ва ракеталар билан уюштирилган оммавий ҳужумлари бунга муносабат эмаслигини айтди.

Шу билан бирга, у Москванинг Россия Украина билан урушда ғалаба қозонишга яқин эканлиги ҳақидаги даъволарини рад этди.

“Украина қуролли кучлари уч ҳафтадан бери Россиянинг янги ҳужумини муваффақиятли қайтармоқда. Россияликлар, юмшоқ қилиб айтганда, унчалик муваффақиятли эмас”, деди Владимир Зеленский.