Путин самолётдан зирҳли поездга ўтди. У ўлимдан қўрқяптими?

Россия Президенти Владимир Путин сўнгги икки йил давомида Россия бўйлаб самолётда эмас, балки махсус зирҳли поездда саёҳат қилишни афзал кўрмоқда. Бу ҳақда 13 февраль  куни “Досье” маркази Путиннинг таниши ва президент маъмуриятига яқин манбага таяниб ёзди. 

“Уруш бошланганидан сўнг, февраль-март ойларида у поезддан, айниқса, Валдайдаги қароргоҳига етиб бориш учун жуда фаол фойдалана бошлади”, дейилади “Досье”да. 

Нашр маълумотларига кўра, поезд Путиннинг 2014—2015 йиллардаги саёҳатлари учун ўзгартирилган, бироқ у Россия қўшинлари Украина билан чегарага ўтказилишидан бироз аввал – 2021 йил август-сентябрь ойларида ундан мунтазам фойдалана бошлаган.  

Ушбу турдаги транспортнинг асосий афзаллиги шундаки, самолётлардан фарқли ўлароқ, унинг ҳаракатини кузатиб бўлмайди. Бу Путиннинг хавфсизлик муаммолари билан боғлиқ.

Бундан ташқари, президент поезди ташқи кўринишидан Россия темир йўлларидаги бошқа поездларга деярли ўхшаб кетади, унинг ранги кулранг ва қизил чизиқли. Бироқ, у сезиларли фарқларга эга: биринчидан, президент вагонлари зирҳли, иккинчидан, поезд энг юқори устуворликка эга ва унинг жадвали Путиннинг саёҳат режаларига мослаштирилади, бу эса унга максимал тезликда ва тўхтамасдан ҳаракатланишига имкон беради. Тахминларга кўра, поезд таркибида ётоқхона ва учрашувлар учун кабинет билан жиҳозланган президент вагони, қўриқлаш вагони ва махсус алоқа вагони бор.

Манбага кўра, зирҳли поезд Москвадаги “Сокол” метро бекати яқинида, замонавий “Ласточка” поездларига хизмат кўрсатувчи Москва тезюрар дирекциясининг “Подмосковная” депоси ёнида тайёрланаётгани айтилмоқда.

Президент ва Бош вазир учун мўлжалланган махсус поезд борлиги сир эмас, буни 2019 йил ноябрида “Комсомольская правда”да эълон қилинган таъриф ҳам тасдиқлаган. Поезднинг шаклланиши давлатнинг биринчи шахсларининг ҳар бир сафари учун яратилган ва фақат бир нечта махфий вагонлардан иборат, қолганлари эса оддий купе ва вагонлардир. Поезд иккита ТЭП70БС тепловози томонидан тортилади.

Путин поезддан фойдаланиши омма олдида кам намойиш қилади, охирги марта 2012 йилда учрашув чоғида поездда суратга тушган. Зирҳли поезднинг олдинги версияси икки-уч йилдан сўнг янгисига алмаштирилди.

Поезд олигарх Юрий Ковальчук тузилмалари билан боғлиқ бўлган “Grand Service Express” компаниясига тегишли бўлиши мумкин. Ковальчук тузилмалари Геленжик яқинидаги Путин саройини ҳам бошқаради.

“Forbes” 2005 йилда Москва ва Санкт-Петербург ўртасида ҳаракатланадиган "ғилдиракли меҳмонхона" деб номланган биринчи хусусий поезд жорий этилгани ҳақида хабар берди. Поезд 2002 йилда “Zheldorconsulting” томонидан ташкил этилган “Grand Service Express” компаниясига тегишли эди. Компаниянинг ҳаммуаллифлари орасида Юрий Ковальчукнинг жияни Кирилл Ковальчук ҳам бор, у Миллий медиа гуруҳининг ҳозирги президенти. Ушбу поезддаги купелар стандартидан икки баробар катта, магнит қулфлар, гиламлар, диванлар ва ҳатто Wi-Fi билан жиҳозланган.

Юридик шахслар реестрига кўра, ташувчининг охирги эгалари Кипрнинг Sorena Investments Ltd ва Британия Виржиния оролларининг Piper Treatment Corp компаниялари ҳисобланади. Sorena Investments Ltd бизнесмен Михаил Рабиновичга тегишли бўлиб, у “Forbes” томонидан Лондон ва Гибралтарда яшовчи ва вақти-вақти билан Россияга ташриф буюрадиган профессионал темирйўлчи сифатида тавсифланган. 

“Grand Service Express” компаниясига ким эгалик қилишини аниқлаш қийин, аммо Рабиновичнинг Sorena Investments Ltd оффшор компанияси ўз улушини сотган,  ашувчининг 80 фоизи эса Россия темир йўллари, қолган 20 фоизи эса Piper Treatment Corp’га тегишли.

“Grand Service Express” 2020 йилда АҚШ санкциялари остида қолган Қримдаги ягона темир йўл операторидир. 

Юрий Ковалчук Владимир Путиннинг яқин дўсти, улар 1990-йиллар бошида Санкт-Петербург мэрияси орқали танишган. “The Wall Street Journal” нашрининг ёзишича, улар биргаликда Озеро дача кооперативининг ҳаммуассисларига айланган. Ковалчукнинг бизнес шериклари Россия банки, СОГАЗ суғурта гуруҳи ва Алина Кабаева бошчилигидаги Миллий медиа гуруҳи каби турли тузилмаларни назорат қилади. Ковалчук тузилмалари, шунингдек, Путиннинг норасмий қароргоҳларини, бир нечта яхталарни, авиакомпанияни бошқаради ва “Комплекс” ва “Бином” шўба компаниялари орқали Геленжик яқинидаги Путин саройига эгалик қилади.

Қайд этилишича, Путинга поезддаги саёҳатларида Марказий клиник шифохонадан онколог ва отоларинголог ҳамроҳлик қилмоқда.

Айни пайтда, Марказий клиник шифохонанинг шартномалари Россия давлат харидлари веб-сайтидан йўқолди, деб ёзади "Система" деб номланган "Озодлик" тадқиқот лойиҳаси. Бу расмийлар ушбу шифохона шифокорлари хизмат кўрсатаётган Путиннинг соғлиғи ҳақидаги маълумотларни яшира бошлаганини кўрсатиши мумкин. Хусусан, 2022 йилнинг апрель ойида “Проект” нашри давлат харидлари маълумотларини таҳлил қилиб, кўпинча Президентга қалқонсимон без саратони ва отоларингология бўйича ихтисослашган жарроҳ ҳамроҳлик қилишини аниқлади. Бундан ташқари, бир сафарда Путинга 6 дан 13 гача мутахассис ҳамроҳлик қилиши мумкин.