Путин Россияни “ҳалокатли сирпанчиқ” йўлга итармоқда – Шольц

Германия канцлери Олаф Шольц Россия Президенти Владимир Путин ўз мамлакатини “ҳалокатли сирпанчиқ” йўлга итариб юбораётганини айтди. Бу фикрни у “Мемориал” инсон ҳуқуқлари маркази асосчиларидан бири Ирина Шербаковага Германиянинг “Марион Дёнхофф” рағбатлантирувчи мукофотини топшираётганда билдирган. 

“Путин Украинага қарши энг жирканч жиноятларга буйруқ бермоқда ва шу билан бирга ўз мамлакатини ҳалокатли сирпанчиқ қияликдан пастга туширмоқда”, дейди ҳукумат раҳбари.

Шольцнинг фикрича, Путин Украина билан можарода “умидсиз йўлдан адашган”.

“Тинч аҳолига, болаларга, аёлларга ракеталарни учириш орқали у нафақат халқаро ҳуқуқни бузади, балки шу билан бирга ақлга сиғмайдиган маънавий тубсизликка йўл очади”, дейди Шольц.

Шунингдек, Германия канцлери Украина бу можарода мағлуб бўлмаслиги кераклигини таъкидлаган. Ҳамда Берлин Россия ўз қўшинларини олиб чиқмагунча, Киевга ёрдам кўрсатишда давом этишга тайёрлигига ишонтирган.

Бундан ташқари, Шольц Россия давлати раҳбари билан мулоқотдан бутунлай воз кечиш катта хато бўлишини ва уни қайта тиклаш зарурлигини айтиб ўтган.