Путин мигрантлар етишмовчилиги масаласи билан шуғулланишга ваъда берди

Олам 9650
image

Россия Федерацияси Президенти Владимир Путин мамлакатда меҳнат мигрантлари етишмаслиги масаласини хорижий ҳамкор давлатлар раҳбарлари билан муҳокама қилишга ваъда берди. Бу ҳақда у бугун, 23 декабрь куни Давлат кенгаши ва Стратегик ривожланиш ҳамда миллий лойиҳалар кенгашининг қўшма йиғилишида айтиб ўтди.

“Буни бизга меҳнат муҳожирлари келадиган давлатлардаги ҳамкасблар билан муҳокама қилиш керак ва мен буни қиламан”, деган Путин.

У мигрантлар ишлаши учун шароит яратилиши кераклигини таъкидлаб, хавфсизлик масаласига ҳам тўхталиб ўтган.

Қайд этиш керакки, шу йиғилишда Бош вазир ўринбосари Марат Хуснуллин қурилишларда ишчи кучи етишмаётганини айтиб, Путинга мурожаат қилган.

Унинг сўзларига кўра, коронавирус пандемия билан боғлиқ вазият туфайли Россияда жорий йилнинг биринчи ярмида уй-жойларни фойдаланишга топширишда қарийб 10 фоизга, ипотека кредитларида 17 фоизга пасайиш кузатилган. Жорий йилнинг 11 ойида уй-жойларни фойдаланишга топшириш ўтган йилги кўрсаткичдан 1,4 фоизга ошган ва йил охирига бориб, катта эҳтимол билан 2019 йилдаги даражасига етади.

Россия ИИВ маълумотига кўра, жорий йилда мамлакатнинг турли минтақаларида хорижий ишчи кучи 20-50 фоизга қисқарган. Ноябрь ойи бошидаги маълумотга кўра, Россияда 1,88 млн мигрант ишлаяпти. 2019 йилда бу кўрсаткич 2,35 млнга тенг бўлган.

Аввалроқ, 2020 йилнинг 11 ойи давомида 467 минг нафардан ортиқ ўзбекистонлик мигрант Ватанга қайтгани ҳақида хабар берган эдик. Уларнинг 257 минг нафари Россиядан келган.

Суннатилла Абдуллаев
Мақолага баҳо беринг
Баҳолаганлар: 536
Рейтинг: 3
t
×