Путин Кремлда Трампнинг одамлари билан учрашди

Россия Президенти Владимир Путин, унинг ёрдамчиси Юрий Ушаков ва Путиннинг махсус вакили, Россия тўғридан тўғри инвестициялар жамғармаси бош директори Кирилл Дмитриев АҚШ Президенти Дональд Трампнинг махсус вакили Стив Уиткофф, Трампнинг куёви Жаред Кушнер ҳамда Оқ уйнинг катта маслаҳатчиси Жош Грюнбаум билан Кремлда ёпиқ эшиклар ортида учрашув ўтказди. Бу ҳақда Россия етакчисининг матбуот хизмати хабар берди. 

Учрашув кеча, 22 январь куни кечқурун бўлиб ўтган. Томонлар Украинада давом этаётган урушни тўхтатишнинг эҳтимолий йўлларини муҳокама қилган.

Учрашувлардан кейинги хулосалар эълон қилинмаган. Кремль матбуот хизмати хабарига кўра, учрашув уч ярим соатдан ортиқ давом этган.

Маълумот учун, Жаред Кушнер 2017 йил январидан 2021 йил январигача Трамп маъмуриятида катта маслаҳатчи лавозимида ишлаган. Ҳозирда у АҚШ маъмуриятида расмий лавозим эгалламаган бўлса-да, Трампга таъсирини сақлаб қолган ва Оқ уйнинг дипломатик ҳамда сиёсий ташаббусларида иштирок этиб келмоқда.

Жош Грюнбаум АҚШ Умумий хизматлар бошқармаси таркибидаги Федерал харидлар хизмати комиссари бўлиб, Трамп томонидан яқинда ташкил этилган “Тинчлик кенгаши”нинг катта маслаҳатчиси этиб тайинланган. Ушбу музокараларда у илк бор қатнашди.

Бундан аввал шунга ўхшаш учрашув Стив Уиткофф ва Владимир Путин ўртасида 2025 йилнинг декабрь ойи бошида бўлиб ўтган. Ўшанда музокаралар беш соат давом этган, бироқ сезиларли натижа бермаган. 

Украинадаги можарони тинч йўл билан ҳал этиш бўйича музокаралар 23 январь куни Абу-Дабида давом этиши кутилмоқда. Унда узоқ вақтдан бери илк бор Москва ва Киев вакиллари бевосита учрашади. АҚШ ушбу музокараларда воситачи сифатида иштирок этади.

ОАВга кўра, томонлар Трампнинг Фаластин – Исроил можароси ва бошқа низоларни тартибга солиш учун ташкил этган “Тинчлик кенгаши”га Россияни таклиф этиш масаласини, шунингдек АҚШ ҳудудида музлатиб қўйилган Россия активлари тақдирини муҳокама қилган. 

Эслатиб ўтамиз, аввалроқ Владимир Путин АҚШда музлатиб қўйилган Россия активларидан 1 миллиард АҚШ доллари “Тинчлик кенгаши”га ажратилиши, қолган маблағлар эса Украинадаги уруш оқибатида вайрон бўлган ҳудудларни тиклашга йўналтирилиши мумкинлиги ҳақида айтганди.