Путин Кимга Трамп билан учрашуви олдидан маълумот берди

Бугун, 12 август куни Россия Президенти Владимир Путин Корея Халқ Демократик Республикаси (КХДР) етакчиси Ким Чен Ин билан телефон орқали мулоқот қилди. Бу ҳақда Кремль матбуот хизмати хабар берди.

Путин кореялик мавқедошини 15 август куни нишонланадиган “Кореянинг япон мустамлакасидан озод этилганининг 80 йиллиги” миллий байрами билан самимий табриклаган. Ким Чен Ин эса КХДР бу байрамни умумий байрам деб ҳисоблашини, босқинчиларга қарши курашда Қизил Армия тутган ўринни ёдда сақлашини таъкидлаган.

Ҳар икки томон 2024 йилнинг 19 июнида Пхеньянда имзоланган Россия ва КХДР ўртасидаги ҳар томонлама стратегик ҳамкорлик тўғрисидаги шартнома доирасида дўстлик, яхши қўшничилик ва ҳамкорлик муносабатларини барча йўналишларда янада ривожлантиришга содиқлигини яна бир бор тасдиқлаган.

Владимир Путин Курск вилояти ҳудудини Киев режимининг бостириб кирган кучларидан озод қилиш жараёнида КХДР томонидан кўрсатилган ёрдамни, шу жараёнда КХДР аскарлари намоён этган жасорат, қаҳрамонлик ва фидойиликни юқори баҳолаган.

Россия Президенти, шунингдек, АҚШ Президенти Дональд Трамп билан бўлиб ўтадиган келгуси музокаралар олдидан Ким Чен Ин билан маълумот алмашган.

Владимир Путин ва Ким Чен Ин келгусида шахсий алоқаларни давом эттиришга келишиб олган.

Маълумот учун, 2024 йилнинг 19 июнида Владимир Путин Пхеньянга қилган ташрифи чоғида стратегик ҳамкорлик тўғрисидаги шартнома имзоланган. Ушбу битимга кўра, ҳар икки давлат бошқа давлат томонидан қуролли ҳужумга учраган тақдирда бир-бирига ҳарбий ва бошқа шаклларда ёрдам кўрсатишга мажбур.

2024 йилнинг кузида КХДР ҳарбийлари Россиянинг Курск вилоятига юборилган ва у ерда Украина армиясига қарши жанг қилган. Дастлаб Россия ҳукумати бу ҳолатни инкор этган бўлса-да, 2025 йилнинг апрелида Мудофаа вазирлиги, Ташқи ишлар вазирлиги ва шахсан Президент Владимир Путин бу иштирокни тасдиқлади. Пхеньянда эса бу операция “ғалабали якунланган” деб эълон қилинди.

Эслатиб ўтамиз, аввалроқ Шимолий Корея Россия томонида жанг қилаётган ўз қўшинлари сонини уч баравар оширишга тайёрлиги ҳақида хабар берилганди. Разведка ҳисоб-китобларига кўра, Пхеньян Москвага ёрдам бериш учун қўшимча 25-30 минг аскар юбориши мумкин.