Путин борган Остона кўчаларида Украина байроғи намойиш этилди (видео)
Олам
−
28 Ноябрь 2024 15869 1 дақиқа
Кеча, 27 ноябрь куни Россия Федерацияси Президенти Владимир Путиннинг ташрифи давомида Қозоғистон пойтахти Остона шаҳридаги LED-экранлардан бирида Украина байроғи тасвири пайдо бўлди. Ҳолат юзасидан Қозоғистон Ички ишлар вазирлиги жиноят иши қўзғатган. Бу ҳақда “Tengrinews.kz” хабар берди.
Украина байроғи тасвири “Астана Опера” театри ёнига ўрнатилган LED-экранда пайдо бўлган. Бу тасвир Россия Президенти Владимир Путин давлат ташрифи билан мамлакатга келгани муносабати билан шаҳарнинг бошқа LED-экранларида акс эттирилган Россия давлат байроғи тасвири ўрнига алмаштирилган. Шу куни Путин Қозоғистон Президенти Қосим-Жомарт Тўқаев билан музокаралар ўтказган.
“Жиноят иши қўзғатилди. Юз берган ҳодисанинг барча тафсилотлари аниқланмоқда. Қонунга зид ҳаракатларни амалга оширган шахслар жавобгарликка тортилади”, дейилади вазирлик хабарида.
Маълум қилинишича, “Керуен Медиа” МЧЖ (Остонадаги LED-экранларга эгалик қилувчи компания) билан боғлиқ воқеа бўйича суриштирув ишлари бошланган. Ички ишлар вазирлиги барча эҳтимолий версиялар, жумладан техник носозликлар ва ташқи ноқонуний аралашув эҳтимолини кўриб чиқаётганини билдирган.
Эслатиб ўтамиз, аввалроқ Россия Президенти Владимир Путин давлат ташрифи билан Остонага келгани хабар қилинган эди. Аэропортда уни Қозоғистон Президенти Қосим-Жомарт Тўқаев кутиб олган.
Live
Барчаси