Putin ham Budapeshtda vaqtni behuda o‘tkazishni xohlamaydi – Peskov 

Rossiya Prezidenti Vladimir Putin ham, AQSH Prezidenti Donald Tramp ham shaxsiy muloqotlarda vaqtni behuda sarflashni xohlamaydi. Ikki lider uchrashuvlarni samarali o‘tkazish tarafdori. Bu haqda Rossiya Prezidenti matbuot kotibi Dmitriy Peskov AQSH rahbarining kechagi bayonotiga izoh berayotganida ma’lum qildi. 

Tramp avvalroq Budapeshtda “vaqtni behuda sarflash niyati yo‘qligini” aytgan edi.

“Hech kim vaqtni behuda yo‘qotishni xohlamaydi, na Prezident Tramp, na Prezident Putin. Bu ikki Prezident samarali va natijaviy ishlashga o‘rgangan rahbarlar. Ammo samaradorlik har doim puxta tayyorgarlikni talab qiladi”, dedi Peskov.

Kecha, 21 oktyabr kuni Donald Tramp Oq uyda jurnalistlar bilan suhbatda Rossiya Prezidenti Vladimir Putin bilan Budapeshtda uchrashish haqida hali qaror qabul qilmaganini bildirdi. U ikki kun ichida aniq javob berishini aytdi. 

“Men vaqtni behuda sarflashni xohlamayman”, dedi AQSH Prezidenti.

16 oktyabr kuni Rossiya rahbari bilan telefon orqali muloqotdan so‘ng Tramp Putin bilan Budapeshtda uchrashish niyati borligini e’lon qilgan edi. Uning so‘zlariga ko‘ra, sammit ikki hafta ichida bo‘lib o‘tishi mumkin. Biroq 21 oktyabrda G‘arb ommaviy axborot vositalari “yuqori lavozimli manbalar”ga tayanib, AQSH va Rossiya Prezidentlari sammitiga tayyorgarlik “vaqtincha to‘xtatilgani” haqida xabar berdi.