ПСЖ мухлислари Мессини ҳақоратлади (видео)

ПСЖ мухлислари томонидан Лионель Мессига нисбатан Франция чемпионатининг 29-туридан ўрин олган “Лион”га қарши ўйин (0:1) олдидан  норози оҳангда хуштакбозлик қилинди. Бу ҳақда BBC хабар берди.

Манбага кўра, Мессининг номи стадионда эълон қилинаётган вақтда бир қатор мухлислар аргентиналик ҳужумчини сўккан, лекин айрим мухлислар унинг исми эълон қилинганда қарсак чалди. Сўнги вақтларда ОАВ Мессининг “Барселона”га қайтиши борасида фаол хабар тарқатмоқда, бу ҳолат эса Париж клуби мухлисларига ёқмаяпти.

“Лион”га қарши баҳсда ПСЖ Франция чемпионатида қаторасига иккинчи мағлубиятини қабул қилиб олди. Бунгача жамоа “Ренн” билан ўйинда (0:2) мағлуб бўлганди.

ПСЖ айни дамда 66 очко билан Франция чемпионати турнир жадвалида пешқадамлик қилди. Парижликлар асосий таъқибчиси “Ланс” клубидан 6 очкога олдинда бормоқда. 

Эслатиб ўтамиз, аввалроқ агар Месси собиқ клуби билан келишувга эришса, йилига 10 миллион евро маош олиши маълум бўлганди. “Барселона” раҳбарияти Мессини клубга қайтариш иши бўйича футболчининг агенти билан алоқада бўлиб турибди.