Президентнинг Жиззах сафари бошланди

Президент Шавкат Мирзиёев ҳудудларнинг ижтимоий-иқтисодий ривожи билан танишиш мақсадида бугун, 10 февраль куни Жиззах вилоятига ташриф буюрди.

Президент Матбуот хизматининг хабар беришича, сафар дастуридаги биринчи манзил Пахтакор туманидаги “Пахтакор элита уруғчилиги” фермер хўжалиги бўлган. Хўжалик майдони 100 гектар бўлиб, шундан 80 гектарида пахта ва ғалла, қолган қисмида соя, саримсоқпиёз, беда экилган.

“Давлатимиз раҳбари ўтган йили октябрда Сирдарё вилоятида бўлганида дала четларидаги ерлардан самарали фойдаланиш, фермер ва ишчиларга қулайлик яратиш учун дала уйлари қуриш зарурлигини айтган эди. Бунинг ижроси ва самараси мазкур фермер хўжалигида намоён. Дала четига тут, узум, полиз ва дуккакли маҳсулотлар экилган, асалари уялари қўйилган. Енгил конструкциялардан дала уйи қурилган, унинг томида қуёш панеллари ўрнатилган.

Президентимиз ушбу уйни кириб кўрди, фермер оиласи билан суҳбатлашди”, дейилади хабарда.

Қишлоқ хўжалиги соҳаси мутасаддилари ва пахта-тўқимачлик кластерлари раҳбарлари билан мулоқотда ҳосилдорликни ошириш, аҳоли бандлигини таъминлаш бўйича кўрсатмалар берилган.

“Биз нимага бойлигимиз бўлган ерни кластерларга бердик? Халққа нафи тегиши учун. Энди кластерлар ислоҳотларга муносиб бўлиб, давлат сиёсатини амалга ошириши керак. Қишлоқ хўжалигини саноатлаштириш, корхоналар очиш ва касаначилик орқали ўз ҳудудида ишсизликни камайтириши зарур”, дейди Шавкат Мирзиёев.

Таъкидланишича, Жиззах вилоятида ёшларни деҳқончиликка жалб қилиш орқали 13 мингдан зиёд ёшларнинг бандлигини таъминлаш мўлжалланган.

“Бир пайтлар 1 гектар ерни халққа бериш мумкин эмасди. Ҳозир 200 минг гектар ажратдик. Нима учун? Одамларга даромад манбаи бўлиши учун. Энди “қарсак икки қўлдан чиқиши” керак”, дейди давлат раҳбари.

Фермерларнинг манфаатдорлигини таъминлаш, маҳаллаларнинг “ўсиш нуқталари”ни қўллаб-қувватлаш бўйича кўрсатмалар берилган.