Prezident Toshkent xalqaro moliya markazi to‘g‘risidagi qonunni imzoladi

Bugun, 11 iyul kuni Prezident Shavkat Mirziyoyev “Toshkent xalqaro moliya markazi to‘g‘risida”gi Konstitutsiyaviy qonunni imzoladi. Bu haqda Prezident Administratsiyasi rahbari Saida Mirziyoyeva ma’lum qildi. 

“Bu joriy yilning eng muhim iqtisodiy yangiliklaridan biri hamda qariyb o‘n yildan buyon amalga oshirib kelinayotgan tizimli islohotlarimizning mantiqiy natijasidir. Endilikda Toshkent xalqaro moliya markazini tashkil etish rasman Konstitutsiyaviy qonun darajasida mustahkamlandi”, deb yozdi Mirziyoyeva o‘zining Telegram-kanalida.

Qayd etilishicha, markaz Angliya huquqi asosida, alohida huquqiy maqomga ega bo‘lgan hudud sifatida faoliyat yuritadi. 

Shuningdek, moliya markazi o‘zining maxsus tartibga solish tizimi, mustaqil tijorat sudi hamda ilg‘or xalqaro standartlarga asoslangan huquqiy muhitiga ega bo‘ladi.

“Global investorlar, banklar, investitsiya fondlari va xalqaro moliya kompaniyalari aynan mana shunday shaffof mexanizmlar bilan ishlashga o‘rgangan”, deb ta’kidlaydi Administratsiya rahbari.

Mazkur yangi regulyatorlik ekotizimi xalqaro kapital, zamonaviy moliya xizmatlari va yirik transmilliy loyihalar uchun O‘zbekistonning jozibadorligini oshirishi kutilmoqda. 

“Mohiyatan olganda, ushbu qonun jahon bozorining eng qimmatli aktivi — ishonchga investitsiyadir. Toshkent investorlar uchun tushunarli qoidalarni hamda kapitalning eng yuqori darajadagi himoyasini kafolatlagan holda, jahon moliya tizimining uzviy qismiga va butun mintaqa iqtisodiy rivojining yetakchi drayveriga aylanish sari dadil qadam tashlamoqda”, deydi Saida Mirziyoyeva markaz haqida.

Eslatib o‘tamiz, 9 iyul kuni Oliy Majlis Senatining 17-yalpi majlisida “Toshkent xalqaro moliya markazi to‘g‘risida”gi Konstitutsiyaviy qonun ko‘rib chiqildi hamda maqullangandi.