Президент Навоийда 250 млн долларлик заводни ишга туширди

Жамият 8906
image

Бугун, 25 ноябрь куни Президент Шавкат Мирзиёевнинг Навоий вилоятига ташрифи чоғида “Зарафшон ойна” корхонасини ишга туширишга бағишланган маросим бўлди.

Президент матбуот хизматининг маълум қилишича, Шавкат Мирзиёев 2018 йилда вилоятга ташрифи чоғида ойна ишлаб чиқаришни йўлга қўйиш бўйича кўрсатма берган эди. Бугунга келиб, 250 миллион долларлик ушбу лойиҳа ҳаётга кўчди. Давлат раҳбари рамзий тугмани босиб, “Зарафшон ойна” корхонасини ишга туширди.

“Ҳозиргача бундай корхоналар Фарғона ва Жиззахда бор эди. Мана, уларнинг сафига янги барпо этилган, кенг турдаги маҳсулотлар ишлаб чиқаришга ихтисослашган “Зарафшон ойна” корхонаси ҳам қўшилмоқда. У келгусида янада ривожланиб, халқимизга хизмат қилишига ишонамиз”, дейди Шавкат Мирзиёев.

Корхонанинг йиллик ишлаб чиқариш қуввати 12 миллион квадрат метр. Маҳсулотлар импорт ўрнини босиш билан бирга экспортга ҳам мўлжалланган. Бу ерда 700 киши иш билан таъминланган.

Тадбирда Ғозғон шаҳридаги “Maрмаробод” корхонаси билан ҳам видеоалоқа орқали боғланилди. У мармар ва гранит тошларни қазиб олиб, қайта ишлашга ихтисослашган. Хитой ва Эрон давлатларидан ускуналар олиб келиниб, муҳандис ва мутахассислар жалб қилинган. 300 киши иш билан таъминланган.

Давлат раҳбари Навоий шаҳридаги “Гидро Станко Сервис” масъулияти чекланган жамияти фаолияти билан танишди.

Навоий вилояти саноатлашган ҳудуд. Бу ерда тоғ-кон, металлургия, кимё, энергетика корхоналари кўп. Уларга, умуман, мамлакат саноати ва қишлоқ хўжалигига машинасозлик маҳсулотлари доим зарур.

“Гидро Станко Сервис”да айнан шулар ишлаб чиқарилади. Бу ерда кооперация орқали 100 дан ортиқ қурилма ва мингдан ортиқ турдаги эҳтиёт қисмлар маҳаллийлаштирилган. Натижада 2021 йилда 12 миллион доллардан зиёд валюта маблағларини тежашга эришилган. Жорий йил якуни билан ишлаб чиқариш миқдори 23 миллион доллар бўлиши кутилмоқда.

Корхонага ускуналар Германия, Туркия, Италия ва Хитойдан келтириб ўрнатилган. 370 киши иш билан таъминланган.

Бугунги кунда корхонада қуюв цехи ташкил этиш ва маҳсулотлар турини кўпайтириш устида иш олиб борилмоқда.

Президент мутасаддиларга маҳаллийлаштириш даражасини ошириш бўйича топшириқлар берди.

Qalampir.uz Tahririyati
Мақолага баҳо беринг
Баҳолаганлар: 236
Рейтинг: 3
t
×