Постсовет ҳудудидаги парламент тизими ўзини энг яхши томондан кўрсатмади – Тўқаев

Постсовет мамлакатларидаги парламент тизими ҳали ўзининг энг яхши томонларини кўрсатмади. Грузиядаги сўнгги воқеалар бу хулосани яққол тасдиқлайди. Бу ҳақда Қозоғистон Президенти Қосим-Жомарт Тўқаев “Ana tili” газетасига берган интервьюсида маълум қилди.

"Парламент тизими, албатта, мавжуд бўлиш ҳуқуқига эга. У бир қатор Европа ва ҳатто Осиё мамлакатларида чуқур илдиз отган. Аммо, умуман олганда, ҳар бир давлат сиёсий тузумни танлашда тарихий шароит, миллий менталитет ва сиёсий амалиётдан келиб чиқади. Ходимларим жаҳон амалиётини пухта ўрганмоқда", дейди Президент.

Унинг айтишича, давлат ҳокимиятининг сиёсий тизимини танлаш жуда масъулиятли қарор бўлиб, у парда ортида эмас, балки фақат умумхалқ референдуми орқали қабул қилиниши керак.

“Кучли Президент – ​​нуфузли парламент – ​​ҳисобдор ҳукумат” концепцияси Қозоғистоннинг сиёсий тизимига энг мос келишига ишончим комил. Аммо бу концепцияни тўлиқ амалга ошириш учун биз кўп меҳнат қилишимиз керак. Ишончим комилки, ҳозир ва яқин келажакда президентлик бошқарув шакли Қозоғистон учун энг мақбулдир. Давлатимизнинг барқарор ривожланишига путур етказувчи қарорлар қабул қилишга менинг ҳам, барчамизнинг ҳам ҳаққимиз йўқ. Бу ерда хато қилишнинг иложи йўқ", деди Тўқаев Қозоғистоннинг парламент бошқарув тизимига ўтишини назарда тутувчи туб ислоҳот тайёрланаётгани ҳақидаги гап-сўзларга изоҳ бериб.

Тўқаевнинг постсовет мамлакатларидаги парламент тизими ҳали ўзининг энг яхши томонларини кўрсатмаганини тасдиқлаган Грузиядаги сўнгги воқеалар ҳақида тўхталадиган бўлсак, ушбу мамлакатда 2024 йил 26 октябрь куни парламент сайловлари бўлиб ўтди ва унда ҳукмрон “Грузия орзуси” партияси ғалаба қозонди. Бироқ мухолифат ва ўша пайтдаги президент Саломе Зурабишвили овоз беришнинг расмий натижаларини қабул қилишдан бош тортди ва кўплаб қонунбузарликлар сабаб аҳолини норозилик намойишларига чақирди.

Янги сайланган парламент 14 декабрга президентлик сайловларини белгилади ва фақат битта номзод – собиқ футболчи Михаил Кавелашвили иштирок этган сайловда у 300 кишидан иборат сайловчилар коллегиясининг 224 нафари томонидан сайланди. Зурабишвили эса 29 декабрь куни президент саройини тарк этди.