Почеттино “Реал билан ўйин ҳақида: ”Уларда тарих ва тажриба бор, аммо..."

Бугун, 15 февраль куни Европа Чемпионлар лигаси нимчорак финал баҳсларига старт берилади. Нимчорак финалнинг марказий учрашувида ПСЖ “Реал Мадрид”ни меҳмон қилади. Жамоалар мураббийи ва сардорлари учрашувдан олдин ўтказилган матбуот анжуманида финал олди финалга тенглаштирилаётган ўйин ҳақида фикрларини билдириб ўтди.

Карло Анчелотти ўйиндан олдинги матбуот анжуманида  жамоалардаги босим ҳақида гапирган. 

“Бизда бўлган ягона босим ПСЖдек буюк жамоага дуч келиш. Ўйлашимча, бу босимдан кўра кўпроқ  мотивация бўлиши ҳам мумкин. Чунки икки жамоа футболчилари олдида турган синовлар учун жуда катта мотивацияга эга. Иккала жамоа ҳам гол уриш ва ғалаба қозониш учун курашади. Бизнинг футболимиз бир-бирига жуда ўхшашдир. Биз эртага ўзимизга ишонган ҳолда ўйнаймиз. Бу ЕЧЛнинг финалига татийдиган ўйин бўлади. Ишонаман-ки, кубок йўлидаги асосий рақибларимиздан бирини мағлуб этамиз,” деган “ Реал Мадрид” устози Анчелотти.

Шунингдек, учрашувдан олдинги матбуот анжуманида “лос бланкос” сардори Карим Бензема ҳам иштирок этиб, ПСЖ футболчилари ҳақида илиқ фикрлар билдириб ўтди.

“Мбаппега қарши ўйнаш ҳаяжонли бўлади. Месси? Ажойиб футболчи, одамлар доимий равишда ундан кўп голлар кутишади ва Месси  одамларнинг истагини амалга оширади. Унга қарши узоқ вақт ўйнаб, Месси қандай қилиб буни амалга оширишини кузатганман, бироқ бугун яна бир янги ҳикоя ёзилади. Неймар? У топ футболчидир. Мен билмайман у ўйинга тўлиқ тайёрми ёки йўқ. Агар, Неймар ўйинга тўлиқ тайёр бўладиган бўлса, ПСЖ учун ажойиб бўлади”, деган Карим Бензема.

Матбуот анжуманнинг иккинчи қисмида парижликлар устози Маурисио Почеттино иштирок этди. Аргентиналик мураббий  “Реал Мадрид” бой тарихга эгалиги ҳақида гапирди.

“Бугун жуда ҳам муҳим учрашув бўлади. Биз ўз уйимизда гол уриш ва ютиш учун ўйнаймиз. “Реал Мадрид”да бор бўлган тажриба ёки тарих ПСЖда йўқ, лекин бу бугун мағлуб бўлиш учун ўйнаймиз дегани эмас. Мен ўз жамоамга ишонаман,” деб фикр билдирган аргентиналик мураббий.

Маурисио билан биргаликда парижликлар сардори Маркиниос ҳам анжуманда қатнашди ва учрашув ҳақида шундай деди:

“Бугун жуда ҳам муҳим ўйин бизни кутиб турибди. Гол уриш ва ғалаба қозониш асосий мақсадимиз”.

Маълумот учун, Серхио Рамос собиқ жаомаси “Реал Мадрид”га қарши баҳсини ўтказиб юбориши аниқ. Шунингдек Карим Бензема ва Неймарнинг майдонга чиқиши сўроқ остида. 

Эслатиб ўтамиз, учрашув Тошкент вақти билан эртага 01:00 да бошланади. Шунингдек, “Спортинг” – “Манчестер Сити” ўйини ҳам бўлиб ўтади

Маъруф Абдумаликов