Пхеньян АҚШга қарши жавоб чоралари кўрмоқчи

Шимолий Корея Вашингтон томонидан ноқонуний фаолиятдан тушган маблағларни “ювиш”да айбланган шахслар ва ташкилотларга нисбатан жорий этилган санкцияларни “душманона ҳаракат” деб атади. КХДР Ташқи ишлар вазирининг ўринбосари Ким Ин Чхоль АҚШнинг қатор шимолий кореялик банкирлар ва молия институтларини санкциялар рўйхатига киритиш қарорини кескин танқид қилди. Бу ҳақда Корея Марказий телеграф агентлиги хабар берди.

Дипломат таъкидлашича, Дональд Трамп маъмурияти Шимолий Кореяга нисбатан бир томонлама санкцияларни бугача беш марта жорий этган бўлиб, бу “Пхеньян сиёсатининг Вашингтонга нисбатан ўзгариши ҳақидаги ҳар қандай тахминларга нуқта қўйган”.

Кимнинг сўзларига кўра, АҚШнинг бу ҳаракатлари “очиқдан-очиқ душманона позицияни намоён этади”, ва Пхеньян “мос жавоб чораларини кўради”.

АҚШ маъмурияти 4 ноябрь куни кибержиноятлар ва бошқа ноқонуний операциялар орқали олинган маблағларни ювишда иштирок этган, деб айбланган саккиз нафар жисмоний ва икки юридик шахсга қарши санкциялар жорий этганини маълум қилган эди.

Эслатиб ўтамиз, КХДР раҳбари Ким Чен Ин ва АҚШ Президенти Дональд Трамп 2018-2019 йилларда уч марта учрашган, аммо кейинчалик Пхеньян Вашингтон билан мулоқотни тўхтатган.

Сентябрь ойида Ким Чен Ин АҚШни ядродан воз кечиш талабини дипломатик музокараларни қайта бошлаш учун шарт сифатида қўйишдан воз кечишга чақирган эди.