Пентагон раҳбари Оқ уй рухсатисиз Киевга ҳарбий ёрдамни тўхтатди – CNN

АҚШ Мудофаа вазири Пит Ҳегсет Президент Дональд Трамп маъмуриятига Украинага қурол-яроғ етказиб беришни тўхтатиш ҳақидаги қарори ҳақида маълумот бермади. Бу ҳақда манбаларга таяниб, CNN хабар берди.

Телеканал маълумотларига кўра, Пентагон раҳбарининг қарори “маъмурият ичида шов-шувга сабаб бўлган, улар нима учун тўхтатиб туриш жорий этилгани ва буни Конгресс ва Украина ҳукуматига қандай тушунтириш кераклигини тушунишга ҳаракат қилмоқда”.

“АҚШ Президентининг Украина бўйича махсус вакили Кит Келлогг, шунингдек, Трампнинг Давлат котиби ва миллий хавфсизлик бўйича маслаҳатчиси Марко Рубио етказиб бериш тўхтатилгани ҳақида матбуотдан хабар топди”, дейди CNN манбалари.

Телеканал Трампнинг ушбу қарор учун жавобгар эмаслиги ҳақидаги баёнотига ҳам эътибор қаратди. Кеча, 8 июль куни бўлиб ўтган ҳукумат йиғилишида таъминотни тўхтатиб туришга ким рухсат бергани ҳақидаги саволга жавобан Трамп: 
“Билмайман, нега менга айтмайсиз?”, деди. 
Шу билан бирга, у Украинага ҳарбий ёрдамнинг тўхтатилишини маъқулламаслигини таъкидлаб, Вашингтон Киевга мудофаа қуролларини етказиб беришда давом этаётганини айтди.

CNN манбаларига кўра, таъминотни тўхтатиш қарори Трамп июнь ойида НАТО саммитига сафари чоғида Ҳегсетдан АҚШдаги қурол захираларини баҳолашни сўраганидан кейин қабул қилинган. 

“Ўша пайтда Эрон ва Исроил бир-бирига зарба бераётган эди ва Трамп минтақадаги Америка қўшинларида керак бўлса ўзини ҳимоя қилиш учун етарлича ўқ-дорилар борлигига ишонч ҳосил қилмоқчи бўлган”, дейди манбалар. 

Айни пайтда улар АҚШ Президенти Пентагон раҳбарига Украинага қурол етказиб беришни тўхтатиш бўйича кўрсатма бермаганини айтмоқда. Телеканал манбалари вазирнинг қарорини Ҳегсетда муҳим сиёсий қарорларни бошқа идоралар билан мувофиқлаштириш учун штаб бошлиғи ёки маслаҳатчилари йўқлиги билан боғлади.

“Украинага ҳарбий ёрдамнинг тўхтатилиши билан боғлиқ эпизод Трамп маъмуриятида, айниқса Пентагондаги Ҳегсет даврида кўпинча тартибсиз сиёсат ишлаб чиқиш жараёнини кўрсатади”, деб ҳисоблайди CNN.

Телеканал маълумотларига кўра, Ҳегсет 2025 йилда иккинчи марта Украинага қурол етказиб беришни тўхтатишга қарор қилди ва “Трамп маъмуриятини ҳайратда қолдирди”. Бундай ҳолат биринчи марта февраль ойида бўлган эди, аммо қарор тезда бекор қилинди.

Қўшма Штатлар Украинага ҳарбий ёрдамни тўхтатгани 1 июль куни Ғарб матбуоти хабарларидан маълум бўлди. Трамп Украинага кўпроқ мудофаа қуролларини юборишга ваъда берганидан кейин етказиб бериш қайта тикланди.