ПАОК мухлислари автобуси аварияга учради: 7 киши ҳалок бўлди (видео)

Руминияда Францияга йўл олган Грециянинг ПАОК  футбол клуби мухлисларини олиб кетаётган микроавтобус йўл-транспорт ҳодисасига учради. Оқибатда камида етти киши ҳалок бўлди. Бу ҳақда TVR  нашри хабар берди.

Дастлабки маълумотларга кўра, йўл-транспорт ҳодисасида юк машинаси, ёқилғи ташувчи танкер, енгил автомобиль ва мухлисларни олиб кетаётган микроавтобус иштирок этган. Воқеа микроавтобус ҳайдовчиси бошқа транспорт воситасини қувиб ўтиб, ўз йўлагига қайтишга уринаётган пайтда содир бўлган. Шу жараёнда у ёқилғи танкерига урилиб, кейин қарама-қарши йўналишда келаётган енгил автомобиль билан тўқнашган.

Тез тиббий ёрдам хизмати раҳбарининг сўзларига кўра, ҳалок бўлганлар сони етти нафарга етган. Ҳодиса жойида микроавтобус ҳайдовчиси ва беш нафар йўловчининг жасади аниқланган. Яна бир йўловчи эса касалхонага олиб кетилаётган вақтда вафот этган.

Шунингдек, микроавтобусда бўлган яна уч киши жароҳат олган, уларга тиббий ёрдам кўрсатилиб, шифохонага ётқизилган. Жабрланганларнинг умумий сони ҳозирча аниқлаштирилмоқда.

Маълумот учун, Грециянинг ПАОК жамоаси бугун, 29 январь куни Европа Лигаси доирасида Франциянинг “Лион” клубига қарши сафар учрашувида майдонга тушиши режалаштирилган.