Озарбайжон ва Арманистон Ташқи ишлар вазирлари Анталияда учрашди

Озарбайжон ва Арманистон Ташқи ишлар вазирлари Жайҳун Байрамов ва Арарат Мирзоян бугун, 12 апрель куни Анталия дипломатик форуми доирасида музокара ўтказди. Бу ҳақда Арманистон Ташқи ишлар вазирлиги ўзининг Х ижтимоий тармоғидаги саҳифасида маълум қилди.

Хабарда айтилишича, вазирликлар раҳбарлари “Арманистон ва Озарбайжон ўртасида тинчлик ва давлатлараро муносабатларни ўрнатиш тўғрисидаги битим матни устида ишлаш якунлангандан кейин муносабатларни нормаллаштириш жараёнидаги ишларнинг ҳозирги ҳолати”ни муҳокама қилган. Вазирлар мулоқотни давом эттиришга тайёр эканини билдирган.

Кейинроқ Жайҳун Байрамовнинг таъкидлашича, можародан кейинги давр “ўтмишнинг оғриқли меросини енгиб ўтиш ва минтақада мустаҳкам тинчлик пойдеворини яратиш учун ноёб тарихий имконият яратади”. Бироқ Байрамовнинг сўзларига кўра, бунга “Арманистон Конституцияси ва турли қонун ҳужжатларида мустаҳкамланган доимий ҳудудий даъволар” тўсқинлик қилиши мумкин.

“Ўзаро ишончга таъсир қилишда давом этаётган, минтақавий барқарорликка таъсир кўрсатаётган ва тинчлик кун тартибини илгари суришда секинлик билан бораётган муаммоларни конструктив ҳал қилиш вақти келди”, дея хулоса қилди у.

Март ойи ўрталарида Жайҳун Байрамов Баку ва Ереван ўнлаб йиллар давом этган можарода тинчлик шартномаси бўйича келишувга эришганини айтди.

“Арманистон билан тинчлик битими матни бўйича музокаралар жараёни якунланди”, деди у.

Арманистон Ташқи ишлар вазирлиги ҳам “Арманистон Республикаси ва Озарбайжон Республикаси ўртасида тинчлик ва давлатлараро муносабатлар ўрнатиш тўғрисида”ги шартнома имзолашга тайёрлигини маълум қилди.

“Ереван ҳужжатни имзолаш вақти ва жойи бўйича Баку билан маслаҳатлашувларни бошлашга тайёр”, дейилади баёнотда.

Арманистон Бош вазири Никол Пашинян Озарбайжон билан музокаралар якунланганини муҳим воқеа деб атади. Унинг сўзларига кўра, ҳужжат муросадир, чунки унда икки банд бўйича имтиёзлар мавжуд. Унинг аниқлик киритишича, келишув матнида Европа Иттифоқи кузатувчилари Арманистонда бўлиши ҳақида ҳеч қандай ибора йўқ, бироқ учинчи давлат кучларини киритмаслик ҳақидаги банд бор.

“Бу ҳужжат кучга киргандан сўнг Арманистон ҳам, Озарбайжон ҳам чегаранинг бутун узунлиги бўйлаб учинчи давлат қўшинларини жойлаштирмаслиги керак, дегани”, деб тушунтирди у.

Пашинян, шунингдек, “келишув лойиҳасида фақат Арманистон ёки Озарбайжонга тегишли банд йўқлигини” таъкидлади, уларнинг барчаси ҳар икки давлатга бирдек тегишли.

Озарбайжон Президенти Илҳом Алиев апрель ойи бошида Германия Президенти Франк-Валтер Штайнмаер билан Бакуда бўлиб ўтган қўшма матбуот анжуманида Ереванни Бакунинг “қонуний талабларини” бажаришга ундади.

“Бизнинг талабларимиз Арманистонга яхши маълум, улар янгилик эмас. Биз ҳалигача Арманистондан жиддий жавоб кутамиз”, деди у.

Алиев 1990 йиллар бошида Озарбайжон ва Арманистон ўртасидаги можарони ҳал қилиш учун Европада Хавфсизлик ва Ҳамкорлик Ташкилоти (ЕХҲТ) томонидан тузилган воситачилик гуруҳини тарқатиб юборишни талаб қилмоқда ва Арманистон конституциясидан Тоғли Қорабоғга ҳудудий даъволарни ўз ичига олган Мустақиллик Декларациясига ҳаволани олиб ташлашга ҳаракат қилмоқда. Арманистон конституциясига ўзгартириш киритиш учун референдум ўтказиши керак ва Ереван 2027 йилда референдум ўтказишни режалаштирмоқда.

Озарбайжон раҳбари бу шартлар бажарилгач, икки давлат ўртасида тинчлик шартномасини имзолашда ҳеч қандай тўсиқ бўлмаслигини тушунтирди.