Armanistondan Ozarbayjonga beo‘xshov ayblov: Baku genotsid qilmoqchi

Armaniston Tashqi ishlar vazirligi Tog‘li Qorabog‘ (tan olinmagan respublika)ga Armaniston qurolli kuchlari joylashtirilgani haqidagi Ozarbayjon ma’lumotlarini tekshirish uchun xalqaro faktlarni o‘rganish missiyasini yuborishga chaqirdi. Bu haqda Armaniston TIV bayonotiga tayanib, TASS xabar berdi.

“Armaniston Lochin yo‘lagi bo‘ylab blokadaga qadar ham, 2022 yil 12 dekabrdan keyin ham o‘q-dorilar va harbiy yuklar olib o‘tilmaganini bir necha bor ta’kidlagan. Qolaversa, biz Armaniston Respublikasining Tog‘li Qorabog‘da armiyasi yo‘qligini tasdiqlaymiz”, deyiladi bayonotda.

Hujjatga ko‘ra, ushbu ma’lumotlarning to‘g‘riligini tekshirish uchun Tog‘li Qorabog‘ga xalqaro faktlarni o‘rganish missiyasini yuborish taklifi Ozarbayjon oliy rahbariyatining o‘zi tomonidan bir necha bor rad etilgan.

“Armanistonning mintaqada tinchlikka erishish istagini tasdiqlab, Ozarbayjonning yangi tajovuzni boshlashiga yo‘l qo‘ymaslik uchun Tog‘li Qorabog‘ va Lochin yo‘lagiga zudlik bilan xalqaro faktlarni o‘rganish missiyasini yuborish zarurligini yana bir bor ta’kidlaymiz. Ozarbayjon xalqni bo‘ysundirish uchun Tog‘li Qorabog‘ni etnik tozalash va genotsidga duchor qilishga tayyorlanayotganini qayd etamiz”, deyiladi Armaniston TIV hujjatida.

Ta’kidlanishicha, Ozarbayjon xalqaro hamjamiyatni chalg‘itish uchun yana bir qadam tashlagan. 

“7 mart kuni Ozarbayjon Mudofaa vazirligi xalqaro hamjamiyatni chalg‘itish maqsadida navbatdagi xabarni tarqatdi, go‘yo o‘sha kuni Armaniston Qurolli kuchlarining harbiy texnika kolonnasi Rossiya tinchlikparvar kuchlari hamrohligida Stepanakert – Gaybalishen – Lisagor (Tog‘li Qorabog‘) bo‘ylab o‘tib ketgan. Armaniston Qurolli kuchlari shaxsiy tarkibi xuddi shu yo‘l bo‘ylab olib o‘tilgan. Biz rasman ta’kidlaymizki, bu ma’lumotlar mutlaqo yolg‘on, hech qanday daliliy asosga ega emas va bo‘lishi ham mumkin emas hamda ushbu ma’lumotlar haqiqatga mos kelmaydi”, deya qo‘shimcha qilinadi Armaniston TIV bayonotida.

Eslatib o‘tamiz, Ozarbayjon Mudofaa vazirligi joriy yilning 5 mart kuni ertalab Ozarbayjon armiyasi bo‘linmalari harbiy yuklarni noqonuniy yetkazib berayotgan arman avtomobilini tekshirish uchun to‘xtatmoqchi bo‘lganini ma’lum qildi. Mudofaa vazirligi ma’lumotlariga ko‘ra, avtomobil yo‘lovchilari Ozarbayjon harbiylariga qarata o‘t ochgan. Otishma oqibatida Ozarbayjon Qurolli kuchlarining ikki nafar harbiy xizmatchisi halok bo‘ldi. Armaniston tomoni uch kishi halok bo‘lganini ma’lum qildi.

Ozarbayjon ayni vaqtda Armanistonni Qorabog‘ga qurol-yarog‘, minalar va o‘q-dorilar to‘playotganlikda ayblamoqda. 

Qorabog‘ urushi 

2020 yil 14 iyul kuni Ozarbayjon-Armaniston chegarasida ro‘y bergan to‘qnashuvda Ozarbayjon armiyasining bir general-mayori boshliq 7 nafar askarning shahid bo‘lishi Qorabog‘ning ozod qilinishiga olib kelgan operatsiyaning boshlanishi bo‘ldi. 27 sentyabr kuni Armaniston qo‘shinlari Tog‘li Qorabog‘ yaqinidagi tinch aholi punktlariga o‘t ochdi, Ozarbayjon o‘z yerlarini ishg‘oldan ozod qilish uchun “Qasos” qarshi hujumini boshladi, natijada bosib olingan yerlar birin-ketin ozod qilindi. 

2020 yilning 9 noyabridan 10 noyabrga o‘tar kechasi “Tog‘li Qorabog‘da o‘t ochishni to‘xtatish haqida”gi bayonot imzolandi. Urush yakunlariga ko‘ra, Turkiya qo‘llovidagi Ozarbayjon g‘alaba qildi. Rossiyaning yordamiga umid qilgan Armaniston esa mag‘lubiyatga yuz tutdi.

44 kunlik urush yakunlariga ko‘ra, Ozarbayjon armiyasi mamlakatning 5 shahri, 4 ta posyolka va 286 ta qishlog‘ini arman bosqinchilaridan ozod qildi. Ozarbayjon Qurolli Kuchlarining 2,9 mingdan ortiq harbiy xizmatchisi o‘z ona yurtlarini ozod qilish uchun kurashda halok bo‘ldi.