Ойда футбол учрашуви ўтказилиши мумкин

Олимлар 2035 йилда Ойда илк бор футбол ўйинини ўтказиш лойиҳасини ишлаб чиқди. Бу ҳақда “The EIT” хабар берди.

Манбага кўра, Буюк Британиянинг Муҳандислик ва технология институти олимлари Ойда илк бор футбол ўйинини ўтказиш лойиҳасини ишлаб чиқди. Мазкур ўйин 2035 йилда ташкил этилиши мумкин. Унда одатдагидан бир ярим баравар катта бўлган қора-оқ тўпдан фойдаланиш таклиф этилмоқда. Шлемлар эса ўйинчилар ва мураббийлар ўртасида мулоқот қилиш, ҳакамлар қарорлари ва костюмнинг ҳолатини кўрсатувчи мосламалар билан жиҳозланади.

Ой футболида ҳар икки жамоада 5 нафардан спортчи иштирок этади ва уларга жиҳозларни ишдан чиқармаслик учун бош билан ўйнаш тақиқланади. Футболчилардан тўпга эгалик қилиш эмас, балки тўхтатиб қолиш талаб қилинади. Шунингдек, Ой сиртида ясси майдон ҳосил қилиш учун лазер технологияси қўлланилади. Ўйин майдонининг узунлиги 32 метр, эни эса 25 метрни ташкил қилади. Дарвозалар ҳам одатдагидан фарқли равишда энига деярли 11 метр ва баландлиги 3 метрга ўзгартирилади.

Маълум қилинишича, Муҳандислик ва технология институти 4 ёшдан 13 ёшгача бўлган британиялик болалар ўртасида биринчи ўзга сайёралик “Moon Utd” жамоаси учун либосларни лойиҳалаш танловини эълон қилган.