ОТМ талабалари ва ходимларига коронавирусга қарши дорилар сотиб олинади

Соғлиқни сақлаш вазири Абдуҳаким Ҳожибоев ва Олий ва ўрта махсус таълим вазири Иномжон Мажидов ОТМ талабалари ва ходимларини пандемия даврида коронавирус инфекциясидан ҳимоялашга оид қўшма қарорни имзолагани тўғрисидаги ҳужжат тарқатилди.

Унда талабалар ва ОТМ ходимлари профилактика учун гидроксихлорохин ва цинк препаратини қабул қилиши кераклиги, мабодо коронавирус аниқланган ёки гумон қилинган бўлса, қўшимча дорилар ва тавсиялар асосида муолажаларга амал қилиши лозимлиги таъкидланган.

ОТМларга барча дори воситаларини шартнома асосида “Dori-darmon” АК ва унинг ҳудудий филиалларидан сотиб олиш мажбурияти юклатилган.

Қарорда дори воситаларини харид қилиш билан боғлиқ харажатлар ОТМларнинг бюджетдан ташқари маблағлари ҳисобидан амалга оширилиши айтилган.

Маълумот учун, бундан бир неча ой аввал коронавирусни даволаш жараёнларида Гидроксихлорохин (плаквенил) дори воситасидан фойдаланиш кўплаб баҳс-мунозараларни келтириб чиқарганди.