“Ориёнбанк” раиси ўринбосари қийноққа солиб ўлдирилгани аниқланди

Жорий йилнинг июнь ойида Душанбеда номаълум шахслар томонидан ўғирлаб кетилган Тожикистон “Ориёнбанк” банки бошқаруви раисининг биринчи ўринбосари Шуҳрат Исматуллоев ўлдирилган. Тожикистон Бош прокуратураси маълумотларига кўра, жиноят иши бўйича беш киши қўлга олинган, бир қанча гумонланувчилар хорижга қочишга муваффақ бўлган, улардан бири Кишинёв (Молдова) аэропортида отишма вақтида отиб ўлдирилган. 

“[Ҳужум қилганлар] фуқаро Ш.А.Исматуллоевни жисмоний куч, шовқинли автомат, фен ва бошқа воситалар ёрдамида қийноққа солиб, ўлдирган”, дейилади хабарда. 

Агентлик маълумотларига кўра, банкирнинг жасади Зарафшон дарёсига ташланган, қидирув ишлари давом этмоқда. 

Мамлакат Бош прокуратураси маълумотларига кўра, жиноий иш бўйича айбланувчилар жорий йилнинг 23 июнь куни Душанбедаги банк топ-менежерини ўғирлаб, шаҳар ташқарисига олиб чиққан уюшган жиноий гуруҳнинг 10 дан ортиқ аъзоси бўлган.  

“Ҳозирда ушбу жиноят иши доирасида уюшган жиноий гуруҳнинг беш нафар аъзоси қўлга олинди”, дея қўшимча қилди прокуратура. 

Гуруҳнинг қолган аъзолари қидирилмоқда, прокуратура маълумотларига кўра, иш бўйича икки айбланувчи Россияга, бири Туркияга, иккинчиси Рустам Ашуров Молдовага қочган, у ерда 30 июнь куни мамлакатга киритилмаган ва у Кишинёв аэропортида ўт очган, оқибатда чегара полицияси ходими ва аэропорт хавфсизлиги ходими ҳалок бўлган. Кейинроқ Ашуров олган жароҳатларидан шифохонада вафот этган. Прокуратура бошқа мамлакатлар ҳуқуқ-тартибот идоралари билан биргаликда ҳужумчиларни қўлга олиш чораларини кўраётганини таъкидлади.