OpenAI янги браузерини тақдим этди

Американинг OpenAI компанияси 21 октябрь куни ўтказилган тақдимотда сунъий интеллект асосида яратилган янги ChatGPT Atlas браузерини тақдим этди. Бу ҳақда ChatGPT ўзининг расмий сайтида маълум қилди.

Компания маълумотига кўра, ChatGPT Atlas фойдаланувчиларга турли вазифаларни соддалаштириш имконини беради, масалан, саҳифадаги контентни умумлаштириш, маҳсулотларни таққослаш, матнларни таҳлил қилиш, ҳужжатларни таҳрирлаш ёки ҳатто электрон почталар ва календарь таклифларини бошқариш.

Браузер интерфейси ён панель (sidebar) орқали ChatGPT’ни тезда ишга туширишга мўлжалланган. Фойдаланувчи саҳифадаги бирор сўзни белгиласа, сунъий интеллект дарҳол контекстга мос тавсиялар ёки таҳлилларни таклиф қилади. Бу эса ChatGPT’ни веб-сайтда доимий ёрдамчи сифатида ишлатиш имконини беради.

OpenAI таърифига кўра, “Agent Mode” деб номланган янги функция ChatGPT’га фойдаланувчи номидан турли амалларни бажариш имконини беради. Масалан, ChatGPT фойдаланувчи ўрнига онлайн харидларни амалга ошириши, ресторанларда стол брон қилиши, сайтлардаги шаклларни (формаларни) автоматик тўлдириши ва бошқа интерактив топшириқларни бажара олиши мумкин. Агент режими ҳозирча фақат айрим премиум фойдаланувчилар учун тақдим этилган бўлиб, хавфсизликни таъминлаш мақсадида у чекланган веб-сайтлар доирасида синовдан ўтказилмоқда.

Ҳозирда ChatGPT Atlas браузери фақат macOS тизимида мавжуд. OpenAI вакилларининг маълум қилишича, тез орада Windows, iOS ва Android версиялари ҳам чиқарилади. Дастурий таъминот фойдаланувчининг севимлилари, тарих ва паролларини мавжуд браузерлар (масалан, Chrome ёки Safari)дан осон импорт қилиш имкониятига эга.

Браузерда махфийлик назорати ҳам кучайтирилган, фойдаланувчи истаса, ўз қидирув тарихи ёки ChatGPT билан ўзаро алоқаларини тўлиқ ўчириш ёки “хотирани” вақтинча ўчириб қўйиш имкониятига эга бўлади. ChatGPT Atlas фойдаланувчи маълумотларини моделни қайта ўқитиш учун ишлатмайди.

OpenAI бу лойиҳа орқали браузер бозорида йирик компаниялар билан бевосита рақобатга киришмоқда. Масалан, Google ўзининг Chrome браузерига Gemini сунъий интеллект тизимини қўшган, Perplexity компанияси Comet AI номли браузерини ишлаб чиқди, Microsoft эса Edge браузерига Copilot функциясини интеграция қилган.

Мутаҳассисларнинг фикрича, ChatGPT Atlas ана шу рақобатчилар орасида ўзининг табиий тилга ишлов бериш қобилияти, контекстни чуқур тушуниш ва фойдаланувчи номидан реал амалларни бажариш имконияти билан ажралиб туради.

Эслатиб ўтамиз, аввалроқ OpenAI ўзининг ChatGPT сунъий интеллект чат-боти учун боланинг руҳий ҳолати ёмонлашганда ота-онани хабардор қилиш каби янги назорат функциясини эълон қилган эди.