Олимлар қаҳванинг юракка фойдасини аниқлади

north_east

Қаҳванинг сирли саёҳати: дарахтдан финжонгача

Сан-Францискодаги Калифорния университети ҳамда Аделаида университети олимлари қаҳва истеъмоли юрак ритмининг энг кенг тарқалган бузилишларидан бири – бўлмачалар фибрилляцияси хавфини камайтириши мумкинлигини аниқлади. Бу ҳақдаги тадқиқот JAMA журналида эълон қилинди.

Қайд этилишича, фибрилляция ҳолати юрак уришининг тезлашиши ва нотекислашишига олиб келади, оқибатда инсульт ёки юрак етишмовчилиги юзага келиши мумкин. Олдинроқ, кардиологлар юрак хасталиги бўлган беморларга аритмия симптомлари кучайиши мумкинлиги сабаб кофеинни чеклашни тавсия қилишган. Аммо янги тадқиқот кунига атиги бир стакан қаҳва ичиш бўлмачалар фибрилляцияси ривожланиш эҳтимолини 39 фоизга пасайтиришини аниқлаган.

Тадқиқотда фибрилляция бўлмачалари ёки бўлмачалар тебраниши ташхиси қўйилган 200 нафар бемор иштирок этган. Бу касалликда бўлмачалар қисқариш тезлиги дақиқасига 200-400 мартагача етиши мумкин. Уларнинг барчасига юрак ритмини тиклаш учун электр кардиоверзия қўлланилган. Иштирокчилар икки гуруҳга бўлинган: биринчи гуруҳ иштирокчилари ҳар куни камида бир стакан қаҳва ичган, иккинчиси гуруҳ эса олти ой давомида кофеиндан тўлиқ воз кечган.

Натижаларга кўра, қаҳва ичганларда аритмия қайталаниш хавфи сезиларли даражада камроқ бўлган. Олимларнинг тахминича, қаҳва яллиғланишга қарши таъсир кўрсатиши, шунингдек, ширин, алкоголли ва энергия ичимликларининг ўрнини босиб, юракка тушадиган юкни камайтириши мумкин.

Эслатиб ўтамиз, аввалроқ австралиялик олимлар ошқозон-ичак трактида жойлашган асаб тизими ўсимта ривожланишига бевосита таъсир қилиши мумкинлигини аниқлаган эди. 0 

Моҳичеҳра Қадамова