Ола! “Жеймс Назаров” қимматбаҳо таклифни рад этиб, Ортиқхўжаевнинг маҳсулоти рекламасида текинга тушган

Ўзбекистонда ном чиқарган тадбиркор, пойтахтдаги энг осмонўпар бино Nest one лойиҳасининг инвестори сифатида кўриладиган, аммо бунга кўпинча шубҳа билан қараладиган Мурод Назаров хорижий йирик компаниянинг реклама ролигида 200 минг доллар эвазига суратга тушишни рад этиб, пойтахт ҳокими Ортиқхўжаевга тегишли яна бир компаниянинг рекламасида ғирт текинга ўйнаб берганини маълум қилди. У бу ҳақда блогер Шоира Мирсодиқованинг YouTube канали учун берган интервьюсида гапирган. 

Блогер Назаровдан у суратга тушган рекламадаги маҳсулот кимники экани ҳақида сўраган. 

“Йўқ-йўқ, [маҳсулот] устозимиз Жаҳонгир Ортиқхўжаевнинг қизлариники. Суратга олиш ишлари қизиқ жараён бўлган. 

Кўп жойлардан рекламага таклиф қилишади, қарамайман, биз актёр, реклама агентлиги эмасмиз. Жеймс Бонд ролигини олишдан икки ой олдин бир хорижий, жуда жиддий компаниядан таклиф бўлганди, бир кунлик тасвирга олиш жараёнлари учун 200 минг доллар берамиз, дейишган.  Рози бўлмагандим. 

Лекин [Ортиқхўжаевнинг қизига тегишли маҳсулот]  рекламасига биргина телефон қўнғироғида рози бўлганман. Чунки Жаҳонгир акадан ёмон ғоя чиқмайди. Ўшанда устоз кечаси соат 23:30 ларда телефон қилиб қолдилар, тинчликмикан, деб гўшакни кўтарсам, менга қаранг, битта зўр ғоя бор, сизга мўлжаллаб қилинади. Жеймс Бонд бўлгингиз келадими? Парашютдан сакрашни эплайсизми, дедилар. Мен рози бўлдим. 

Текинга ўйнаб берганман, ўзимга ёққани учун. Икки кун вақтимиз кетган. Ҳаммаёғим қонаб, кўкариб кетганди. Каскадёрлардан фойдаланмадик, ўзим қилдим ҳаммасини. Бир ҳафта қонаб юрди, актёрларга ҳам осон эмас экан”, дейди Назаров. 

Маълумот ўрнида, Ортиқхўжаев ва унинг оиласи Ўзбекистонда ва хорижда ўнлаб корхоналарга эгалик қилади. Бугун Nest one лойиҳасининг инвестори “Özgüven Mimarlık” ширкати ҳам асли келиб чиқиши Ортиқхўжаевга бориб тақалиши ҳақида гап-сўзлар бор.