ОКМКнинг ОЧЛда ўйнайдиган таркиби маълум бўлди

Олмалиқнинг ОКМК клуби Осиё Чемпионлар лигаси учун қайдномасини эълон қилди. 

“C” гуруҳидан жой олган Миржалол Қосимов шогирдларига Саудия Арабистонининг “Ал-Иттиҳод”, Эроннинг “Сепаҳон” ва Ироқнинг “Эйр-Форс” жамоалари рақиблик қилади.

“ОКМК футбол клуби таркибда гуруҳ босқичи учрашувлари учун ўзгартиришлар киритди. Саралаш учрашувларига жамоамиз рўйхатида бўлган ва кейинчалик бошқа жамоаларга йўл олган Нодирбек Абдураззоқов ва Абдулла Абдуллаев рўйхатдан чиқарилган бўлса, яқиндагина жамоамиз сафига эркин агент мақомида келган Бахтиёр Қосимов гуруҳ босқичи доирасида ОКМК шарафини ҳимоя қилиш имкониятига эга бўлди. Шунингдек, ёшлар таркибидан Аслбек Умирзоқов ва Сирожиддин Башриддинов Чемпионлар лигаси қайдномасига киритилди”, дейилади клуб матбуот хизмати хабарида. 

ОЧЛ гуруҳ босқичи 1-тури доирасида ОКМК Жидда шаҳрида Саудия Арабистонининг “Ал-Иттиҳод” жамоаси меҳмони бўлади.

Ўйин 18 сентябрь куни, Жиддадаги “Қирол Абдуллоҳ Спорт Сити” стадионида маҳаллий вақт билан 19:00 да, Ўзбекистон вақти билан эса 21:00 да бошланади.