ОКМКда замонавий керн сақлаш омбори фойдаланишга топширилди

Маълумки, конлардаги геология қидирув ишлари натижасида олинган керн намуналарини сақлаш ва ҳужжатлаштириш учун уларни сақлашга йирик омборлар зарур бўлади.

Ушбу омилларни ҳисобга олган ҳолда Олмалиқ кон-металлургия комбинати томонидан Ўзбекистонда биринчилардан бўлиб жами 60 минг керн яшикларини сақлашга мўлжалланган замонавий кўринишдаги 2 та замонавий керн сақлаш омбори қурилиб, фойдаланишга топширилди.

Ушбу керн сақлаш омборининг афзаллиги ва зарурлиги шундаки, ҳар бир конни геологик ўрганиш мақсадида, олинган керн намуналари ушбу конда ўрганилиб то кон қазиш ишлари тугагунга қадар сифатли сақланиши талаб этилади.

Намуналарни сақлаш муддати 100 йилгача давом этиши мумкин. Сабаби олинган керн намуналарида бир неча босқичда геологик (минералогия, петрография, гидрогеология), технологик ўрганиш ишлари такрор олиб борилиши мумкин.

Бунинг учун эса керн яшикларини сифатли сақлаш, қудуқ номларини ўчиб кетишини олдини олиш, керн яшикларини тартиб билан жойлаштириш зарур. 

Керн сақлаш омборларида барча намуналар тартиб билан сақланади ва геологлар томонидан халқаро JORC кодексининг талаблари асосида Геологик ҳужжатлаштириш ишларини махсус (Getac) планшетларда австралиялик мутахассислар томонидан ишлаб чиқилган  MaksGeo компаниясининг Datashed ва Logchief дастурий таъминотларидан фойдаланган ҳолда олиб боришади.

Бунда ҳужжатлаштиришда маълумотлар электрон интерфаол услубда планшетларга туширилади ва шу заҳоти қайта ишлаш учун дастурий таъминотлар базасига юборилади.

Намуналарнинг ҳар бир сантиметри синчковлик билан ўрганилиб, электрон тарзда геологик ҳужжатлаштирилади. Ҳозирги вақтда кернларни сақлашнинг электрон омбори ҳам мавжуд бўлиб, унда кернларга тегишли бўлган барча маълумотлар сақланади.

Маълумот учун, Олмалиқ кон-металлургия комбинати геологлари томонидан ҳозирги вақтда мамлакатимизнинг 5 та вилоятларида жойлашган 20 га яқин мис, олтин, кумуш, рух, қўрғошин, вольфрам, нодир металлар ҳамда норуда конларидан қазиб олиш ва геологик ўрганиш ишлари олиб борилмоқда.

ОКМК геологларининг маълум қилишича, комбинат хом ашё базасини кенгайтириш мақсадида, Қалмоққир, Ёшлик I конлари ҳамда Ангрен, Чодак ва Хандиза кон бошқармалари шахталарида геология қидирув ишлари давом эттирилмоқда.

Керн – қудуқлардан олинадиган цилиндр шаклидаги яхлит тоғ жинси намунаси бўлиб, унинг ёрдамида тоғ жинсининг таркиби, физик ва кимёвий хоссалари, ётиш бурчаклари аниқланади.

Реклама ҳуқуқи асосида