Оқ уй футболга сиёсат аралашганини тан олди

АҚШ Оқ уйнинг Жаҳон чемпионати бўйича махсус ишчи гуруҳи раҳбари Эндрю Жулиани сиёсатнинг футболга таъсир ўтказаётганини тан олди. Бу ҳақда “Daily Mail” хабар берди.

Маълумки, FIFA яқинда АҚШ терма жамоаси ҳужумчиси Фоларин Балогуннинг дисквалификациясини вақтинча тўхтатиб, унга қизил карточка олганига қарамай Жаҳон чемпионати чорак финалида майдонга тушишига рухсат берган эди.

ОАВларда тарқалган хабарларга кўра, мазкур қарор қабул қилиниши арафасида АҚШ Президенти Дональд Трамп FIFA президенти Жанни Инфантино билан телефон орқали мулоқот қилган.

“АҚШ терма жамоаси ушбу сиёсий вазиятдан чалғиганмиди? Балки. Мен спорт психологи эмасман, шунинг учун буни баҳолашим қийин. Аммо жамоамиз билан фахрланаман улар энг оғир пайтларда ҳам характер намоён қилди”, дейди Жулиани.

У, шунингдек, Англия – Мексика учрашувининг бошқа санага кўчирилишига йўл қўймаслик учун Буюк Британия бош вазири Кир Стармер ҳам жараёнга аралашганини таъкидлади.

Жулианининг фикрича, “футбол сиёсатдан устун” деган қараш амалда ҳар доим ҳам ўзини оқламайди.

“Президент Трампга тенг келадиган инсон йўқ, аммо Жанни Инфантино ундан унча орқада эмас. Футболда Вашингтондагидан ҳам кўпроқ сиёсат бор ва менинг назаримда буни кузатиш жуда қизиқ”, дейди Жулиани.

Малумот учун, 2026 йилги Жаҳон чемпионатининг финали жорий йилнинг 19 июль куни бўлиб ўтади.