Nika pharm tarixiy shaxslar aks etgan reklama sabab jarimaga tortildi

Tarixiy shaxslar obrazidan foydalanib, dori reklamasida axloq va ma’naviyat normalarini buzgan “Nika pharm” MCHJ jarima tortildi. Bu haqda Raqobat qo‘mitasi xabar berdi.

Ma’lum qilinishicha, ijtimoiy tarmoqlar orqali axloq va ma’naviyatning umume’tirof etilgan normalariga muvofiq bo‘lmagan reklama-axborotlarini joylashtirish (tarqatish) holatlari aholining keskin muhokamalariga sabab bo‘lmoqda. Ya’ni, sun’iy intellekt orqali yaratilgan turli notabiiy reklamalarga bo‘lgan tanqidiy ruhdagi izohlar oshib bormoqda.

Xususan, ijtimoiy tarmoqlarda “Nika pharm” MCHJ tomonidan “Rinoksil Formula+” dori vositasi reklamasida buyuk sarkarda Amir Temur, taniqli davlat arbobi va notiq Jorj Vashington, buyuk olim va tabib Ibn Sino (Avitsenna), buyuk qo‘mondon Yuliy Sezar, buyuk shoir va mutafakkir Alisher Navoiy, davlat arbobi, sarkarda Napaleon Bonopart kabi tarixiy shaxslarning obrazlaridan foydalanib, “ushbu dori vositasini ular tomonidan ishlatilganda” deya, turli holatlarda namoyish etilgan.

“Ma’lumki, tarixda ulkan meros qoldirgan buyuk shaxslar xotirasiga hurmat-ehtirom xalqimizning mehr-muhabbatini ifodalaydi, biroq ushbu dori vositasini bunday ko‘rinishda reklama qilinishi taniqli tarixiy shaxslarga, shu jumladan buyuk ajdodlarimizga nisbatan hurmatsizlik, axloq va ma’naviyatimizga zid bo‘lgan tarzda ularning obrazlaridan foydalanilgan”, deyiladi qo‘mita axborotida.

“Reklama to‘g‘risida”gi qonunining 16-moddasida reklamada milliy va oilaviy an’analarga, shuningdek axloq va ma’naviyatning umum qabul qilingan normalariga zid bo‘lgan shakllar, iboralar va obrazlardan foydalanish taqiqlanishi ko‘rsatib o‘tilgan.

Bildirilishicha, yuqoridagi aniqlangan holatlarga muvofiq Raqobat qo‘mitasining hududiy boshqarma maxsus komissiyasi tomonidan “Nika pharm” MCHJga nisbatan “Reklama to‘g‘risida”gi qonunining 16-moddasi talablari buzilishi yuzasidan ish qo‘zg‘atilib, ishni ko‘rib chiqish yakunida belgilangan tartibda moliyaviy jarima qo‘llash bo‘yicha qaror qabul qilingan. 

Shuningdek, aniqlangan qonunbuzilish holatlarini bartaraf etish hamda kelgusida yo‘l qo‘ymaslik yuzasidan bajarilishi majburiy bo‘lgan ko‘rsatmalar berilgan.

Eslatib o‘tamiz, avvalroq qimorni reklama qilgan blogerlar javobgarlikka tortilgan edi.