“Netflix” Амир Темур ҳаётига бағишланган фильм суратга олмоқчи

“Netflix” компанияси саркарда Амир Темур ҳаётига бағишланган тўлиқ метражли фильм суратга олмоқчи. Бу ҳақда “Казинформ” хабар берди.

Амир Темур ҳаёти ҳақида фильмни суратга олиш ишлари Қозоғистон ва Ўзбекистонда бўлиб ўтади. Тарихий фильм сюжетида Амир Темирнинг кучли саркарда ва моҳир ҳарбий стратег сифатида шаклланган даври тасвирланган.

Қайд этилишича, трюклар постановкачиси “Nomad Stunts” гуруҳи асосчиси, каскадёрлар учун “Оскар” мукофоти совриндори Жайдарбек Кунгужинов.

“Бу биз учун жуда муҳим лойиҳа. Биз “Netflix” стриминг хизмати учун лойиҳаларни суратга олишда аллақачон иштирок этганмиз, аммо биринчи марта бизнинг жамоамиз бутун акция учун тўлиқ жавобгар бўлади”, дейди Кунгужинов.

Экстерер суратга олиш ишларининг асосий қисми Қозоғистонда, ички суратга олиш ишлари эса Ўзбекистонда бўлиши режалаштирилган. Фильм ижодкорлари лойиҳага қозоғистонлик мутахассислар – операторлар, либослар дизайнерлари, маъмурий ходимларни жалб этиш ниятида.

Тайёргарлик 2023 йилнинг январь-март ойларида, суратга олиш ишлари эса апрель-май ойларига режалаштирилган.