“Навбаҳор” футбол мактаби “Аякс” академияси бошқарувига ўтади

Намангандаги “Навбаҳор” футбол мактабини уч йил муддатга Нидерландиянинг машҳур “Аякс” футбол академияси бошқарувига бериш бўйича келишувга эришилди. Бу ҳақда бугун, 16 сентябрь куни Президент Шавкат Мирзиёев раислигида Наманган вилоятини ижтимоий-иқтисодий ривожлантириш юзасидан ўтган йиғилишда маълум қилинди.

“Наманганга келиб, футбол ҳақида гапирмасак бўлмайди. Наманганлик ёшлар учун футбол шунчаки ўйин эмас, бу – ҳаёт тарзи. Ҳар бир бола маҳаллада тўп тепиб катта бўлади. “Навбаҳор”нинг ҳар бир ўйини – шаҳар учун катта байрам”, дейди давлат раҳбари. 

Қайд этилишича, яқинда “Навбаҳор” футбол мактабини уч йил муддатга Нидерландиянинг машҳур “Аякс” футбол академияси бошқарувига бериш бўйича келишувга эришилган.

Ушбу академиянинг 11 нафар мураббий, скаут ва методистлари Наманганга олиб келинади.

Президент келажакда бу академияда дунёнинг топ клубларида ўйнайдиган, жаҳон чемпионатларида ўз маҳоратини намоён қиладиган кўплаб футболчилар етишиб чиқишига ишонч билдирди.

Маълумот учун, “Аякс” футбол академияси Амстердам (Нидерландия)да жойлашган футбол академияси бўлиб, у ерда ташкилот жами 13 та ёшлар жамоасини (7-18 ёш оралиғида) бошқаради. Академия Нидерландиянинг “Аякс” футбол клубининг асосий тайёргарлик маркази ҳисобланади. 2020 йил 11 сентябрь куни CIES UEAFA’га аъзо ассоциацияларнинг 31 та энг юқори дивизионида фаолият юритаётган футболчиларни тайёрлаган клублар бўйича йиллик рейтингини эълон қилди. Рейтингда “Аякс” академияси 2-ўринни эгаллаган.