Наманган шаҳрининг 60 минг доллар билан қўлга тушган ҳокими ўрнига янгиси тайинланди

Камолов Айюбхон Орифжонович Наманган шаҳар ҳокими лавозимига тайинланди. Бу ҳақда вилоят ҳокимлиги матбуот хизмати хабар берди.

Тайинлов бугун, 29 октябрь куни халқ депутатлари Наманган шаҳар кенгашининг навбатдан ташқари сессиясида амалга оширилган.

У тайинловга қадар Марказий банк раисининг ўринбосари сифатида ишлаб келаётганди.

Маълумот учун, Айюбхон Камолов 1971 йил 22 февралда Наманган шаҳрида туғилган. Маълумоти олий. 1993 йилда Ленинград қишлоқ хўжалиги институти ва 2001 йилда Наманган муҳандислик – педагогика институтини тамомлаган. У меҳнат фаолиятини 1993 йилда Наманган вилояти ҳокими ҳузуридаги истиқболни белгилаш ва статистика бош бошқармаси бозор муносабатлари истиқболини белгилаш бўлимида 1-тоифали мутахассис сифатида бошлаган.

Айюбхон Камолов 2017 йилдан 2019 йилга қадар Ўзбекистон Республикаси Вазирлар Маҳкамаси ҳузуридаги тадбиркорлик фаолиятини ривожлантиришни қўллаб-қувватлаш давлат жамғармаси ижрочи директори сифатида фаолият юритган.

Эслатиб ўтамиз, аввалроқ Наманган шаҳри ҳокими Анвар Отахўжаев 60 минг доллар пора олаётганда ушланганди.

Отахўжаев ва пойабзал ишлаб чиқарувчи МЧЖ раҳбари ўзаро тил бириктириб, қурилиш соҳасида тадбиркорлик фаолияти билан шуғулланмоқчи бўлган фуқародан шаҳар ҳудудидаги 35 сотих ер майдонида жойлашган, маънан эскирган тураржой бинолари ўрнига кўп қаватли уй барпо этиш ҳуқуқини олиб бериш ва молиялаштириш эвазига 60 минг доллар талаб қилган.

ДХХ томонидан ўтказилган тезкор тадбирда дастлаб МЧЖ раҳбари ушбу сўралган пул маблағини олган вақтида ашёвий далиллар билан ушланган. Шундан сўнг, тезкор тадбир давом эттирилиб, шаҳар ҳокими ўзининг яна бир ишончли одами бўлган – ҳокимликнинг девонхона мудири орқали МЧЖ раҳбаридан 60 минг АҚШ долларини олган вақтида унинг ноқонуний ҳаракатларига чек қўйилган.

Наманган шаҳар ҳокими депутатлик дахлсизлик ҳуқуқидан маҳрум қилиниб, Давлат хавфсизлик хизматининг Наманган вилояти бошқармаси Тергов бўлими томонидан унга ва девонхона мудирига нисбатан Жиноят кодексининг 210-моддаси (пора олиш) 3-қисми “а” банди билан, МЧЖ раҳбарига нисбатан эса Жиноят кодексининг 168-моддаси (фирибгарлик) 4-қисми “а” банди ва 28, 211-моддаси (пора бериш) 3-қисми “а” банди билан жиноят иши қўзғатилган.

Билдирилишича, шаҳар ҳокими Отахўжаевга нисбатан “қамоқ” эҳтиёт чораси қўлланган. Тергов доирасида ҳокимнинг бошқа ноқонуний ҳаракатларига нисбатан ҳам ҳуқуқий баҳо берилиши айтилган.

Анвар Отахўжаев ушбу лавозимда 2023 йилнинг 18 декабридан буён фаолият юритиб келаётган эди.