На Роналду, на Месси... Google энг кўп қидирилган спортчилар рўйхатини эълон қилди

“Интер Майами” ҳужумчиси Лионель Месси ва Саудия Арабистонининг “Ал-Наср” клуби ҳужумчиси Криштиану Роналду 2023 йилда Google'да энг кўп қидирилган 10 та спортчи қаторига киритилмади. 

Google қидирув тизимида сўровлар бўйича биринчи ўринни NFL (Америка футболи) “Баффало Биллс” жамоаси ярим ҳимоячиси Дамар Хемлин эгаллади. 2-ўринни ПСЖ ҳужумчиси Килиан Мбаппе банд этди. Кучли учликни “Канзас Сити Чифс” (NFL) аъзоси Трэвис Келси якунлаб берди. Футболчилар орасида “Бавария” ва Англия терма жамоаси ҳужумчиси Ҳарри Кейн 5-ўринни эгаллаган. “Мемфис” клуби баскетболчиси Жа Морант эса 4-ўринга жойлашди.

Рейтинг:

 1. Хэмлин (Америка футболи);
2. Килиан Мбаппе (футбол);
3. Трэвис Келси (Америка футболи);
4. Жа Морант (баскетбол);
5. Харри Кейн (футбол);
6. Новак Жокович (теннис);
7. Карлос Алькарас (теннис);
8. Рачин Равиндра (крикет);
9. Шубман Гилл (крикет);
10. Кайри Ирвинг (баскетбол).

Маълумот учун, Лионель Месси 2023 йилда “Олтин тўп” мукофотига эга чиқди. Аргентиналик футболчи ўтган ёзда эркин агент сифатида “Интер Майами”га ўтган эди. Криштиану Роналду эса 2023 йилнинг январидан буён “Ал-Наср”да ўйнамоқда. Бунгача португалиялик футболчи Англиянинг “Манчестер Юнайтед” клуби шарафини ҳимоя қилган.