Музокаралар учун Россия Украинадан қўшинларини олиб чиқиши керак – Шольц
Олам
−
18 Сентябрь 2023 4679
Германия канцлери Олаф Шольц Украинадаги вазият бўйича тинчлик музокараларини бошлаш шартларини айтди. Бу ҳақда РИА Новости хабар берди.
Шольц 17 сентябрь куни бўлиб ўтган Верди касаба уюшмасининг федерал конгрессида сўзлаган нутқида Россия Украина ўртасида тинчлик музокараларини бошлаш учун россияликлар Украинадан ўз қўшинларини олиб кетиши кераклигини маълум қилган.
“Россия Президенти қўшинларни олиб чиқишга рози бўлиши керак. Бу икки мамлакат ўртасидаги музокаралар учун жуда зарурдир”, деган Шольц.
Маълумот учун, жорий йилнинг июнь ойида Германия канцлери Олаф Шольц Парижда “Веймар учбурчаги” форматида бўлиб ўтган учрашувда Россия Президенти Владимир Путин режаси барбод бўлганини англаши ва дарҳол Украинадаги урушни тугатиши кераклигини айтган эди.
Кремль эса Украинада тинчликка эришиш учун ҳозирда ҳеч қандай шарт-шароит йўқлиги, Россия учун мутлақ устуворлик махсус операция мақсадларига эришиш эканлигини таъкидлаганди.
Эслатиб ўтамиз, аввалроқ Россия Федерацияси Хавфсизлик Кенгаши раиси ўринбосари Дмитрий Медведев Россия ҳозирги Украина давлати ер билан йўқ қилинмагунча тўхтамаслиги кераклигини билдирган.
