Музокаралар чўзилиб кетди. Раҳмон ва Жапаровнинг махфий суҳбати 5 соатдан бери тугамаяпти

Олам 6878

Аввалроқ Қирғизистон Президенти Садир Жапаров ва Тожикистон Президенти Имомали Раҳмон ўртасида Душанбедаги “Миллат саройи”да музокаралар бўлиб ўтаётгани ҳақида хабар бергандик

Қайд этиш керакки, мезбон Тожикистон ва меҳмон Қирғизистон раҳбарлари ўртасидаги икки томонлама шаклдаги музокаралар бошланганига беш соатдан ошди.

Давлат раҳбарлари “тет-а-тет” форматидаги учрашувни маҳаллий вақт билан соат 9:20 да бошлаган ва 11:00 гача давом этиши кутилганди. Учрашув олдидан Имомали Раҳмон “биз икки томонлама ҳамкорликнинг барча томонларини муҳокама қилишимиз керак ва ўзаро алоқаларимизнинг самарали ривожланишидан манфаатдормиз”, деганди. 

Садир Жапаров эса бунга жавобан шундай деди: “Бизнинг ўзаро алоқаларимиз 28 апрель воқеаларидан кейин қийин даврни бошдан кечирди. Бундай ҳолат такрорланмаслиги учун биз муаммони ҳал қилишимиз керак ... Қирғизлар ва тожиклар биродар халқдир”.

Маҳаллий ОАВга кўра, кейин Президентлар ёпиқ эшиклар ортидаги йиғилиш хонасига кириб кетган. Уларнинг қўлида одатда рассом, дизайнер ва архитекторлар фойдаланадиган, чизмаларнинг букланмаслигини таъминловчи махсус идиш — тубуслар бўлган.

Фото: Тубус

Маълумот ўрнида, “тет-а-тет” форматидаги учрашувда одатда фақат томонлар ёлғиз ҳолда юзма-юз музокара олиб боради. Бундай суҳбатларда ўта махфий мавзулар муҳокама қилинади. Режага кўра, соат 11:00 да кенгайтирилган таркибдаги йиғилиш бошланиши керак эди. 

Эслатиб ўтамиз, Қирғизистон Президенти билан биргаликда Ташқи ишлар вазири, Вазирлар Маҳкамаси раисининг ўринбосари — Иқтисодиёт ва молия вазири, Президент маъмурияти ташқи сиёсат бўлими бошлиғи, Транспорт ва коммуникациялар вазири, Фавқулодда вазиятлар вазир, Маданият вазири, Вазирлар Маҳкамасининг Боткен вилоятидаги ваколатли вакили, Миллий хавфсизлик давлат қўмитаси чегара хизмати директори келган.

Протоколга кўра Қирғизистоннинг расмий делегацияси маҳаллий вақт билан соат 15:00 да Бишкекка қайтиб кетиши керак эди.

Тожик-қирғиз можароси

Маълумот ўрнида, жорий йилнинг 28 апрель куни Қирғизистоннинг Боткен вилояти Кўк-Тош қишлоғи яқинидаги “Головной” сув олиш жойидаги давлат чегарасининг қирғиз-тожик қисмида икки мамлакат маҳаллий аҳолиси ўртасида тўқнашув содир бўлди. 29 апрелда Қирғизистон ва Тожикистон хавфсизлик кучлари ўртасида қуролли тўқнашувга айланди. Қирғизистоннинг Боткен вилояти Боткен ва Лайлак туманларида отишмалар 30 апрель ва 1 май кунлари давом этди. 

1 май куни томонлар отишмани тўлиқ тўхтатиш ва чегарадан кучларни олиб чиқиб кетиш тўғрисида келишиб олишга муваффақ бўлди. Худди шу куни тожикистонлик ҳарбийлар Қирғизистон ҳудудидан чиқиб кетди.

Фаррухжон Муродқулов
Мақолага баҳо беринг
Баҳолаганлар: 126
Рейтинг: 3.1
t
×