Москвага Ўзбекистондан сайёҳлар оқими кўпайгани айтилди

2023 йил ёз мавсумида Москвага 7,1 миллионга яқин сайёҳ ташриф буюрди. Бу ўтган йилга нисбатан 17 фоизга кўп. Бу ҳақда Москва мэри Сергей Собянин ўзининг шахсий блогида ёзиб қолдирди. 

“2023 йилнинг ёзги мавсумида Москвага 7,1 миллион меҳмон ташриф буюрди, бу ўтган ёзга нисбатан 17 фоизга кўп. Яна 4,6 миллион меҳмон тунаб қолмасдан пойтахтга экскурсия мақсадида келган. Умуман олганда, июнь-август ойларида шаҳарга деярли 12 миллион саёҳатчи ташриф буюрди, бу ўтган йилги кўрсаткичлардан 35 фоизга кўпдир”, дейилади хабарда. 

Мэрнинг билдиришича, Россия ҳудудларидан келган меҳмонлар сони 6,5 миллион кишини ташкил этган, бу туризм бўйича рекорд йил сифатида эътироф этилган 2019 йилга нисбатан 8 фоизга кўп. Бундан ташқари, йилнинг биринчи ярмида Москвага қарийб 1 миллион хорижий сайёҳ келган, ёзда эса Россия пойтахтига хориждан 600 мингдан ортиқ сайёҳ ташриф буюрган. 

Собянин МДҲда бўлмаган давлатлардан келган хорижлик меҳмонларнинг аксарияти Хитойдан эканлигини, сайёҳлар сони бўйича биринчи бешликдан Эрон, Бирлашган Араб Амирликлари, Туркия ва Ҳиндистон ҳам борлигини қўшимча қилган. Қўшни давлатлар орасида Ўзбекистон, Беларусь ва Қозоғистондан келган сайёҳлар устунлик қилди. 

Пойтахт мэри туризм Москва иқтисодиёти ривожига катта ҳисса қўшишини айтиб, жорий мавсум якунларига кўра, сайёҳлик харажатлари 372 миллиард рублни ташкил этганини билдирган.