Москва метросини портлатмоқчи бўлган шахс ушланди

Россия пойтахти Москва метросини портлатиб, шаҳардаги яҳудийлар ибодатхонасида терактлар уюштиришни режалаштирган шахс Федерал хавфсизлик хизмати (ФХХ)ходимлари томонидан тўхтатилди. Бу ҳақда ТАСС хабар берди.

ФХХ  маълумотларига кўра, ушбу шахс аппарат дўконларидан портловчи моддалар учун материаллар сотиб олган. Унинг уйини тинтув қилиш чоғида қўлбола портловчи моддалар учун бутловчи қисмлар, жумладан алюминий кукуни, аммиакли селитра, ацетон ва гидроперит моддалари топилган. Бундан ташқари, гумонланувчи бомба ясашда чиқадиган зарарли моддалардан  ҳимоя воситаларини сотиб олган.

Хабарда айтилишича, эркак телефон орқали араб тилида портловчи мосламани йиғиш бўйича кўрсатмалар олиб келган ва унинг телефонидан ИШИДга алоқадор далиллар топилган.

Федерал хавфсизлик хизмати матбуот хизматининг маълум қилишича, Марказий Осиё давлатларидан бирининг фуқароси бўлган ушбу шахс пойтахт метросида ва Москва вилоятидаги яҳудий муассасаларидан бирида портловчи моддаларни портлатишни режалаштирган. 

“У террорчилик ҳаракатини амалга оширгач, Афғонистонга бориб , халқаро террорчилик ташкилоти сафига қўшилишни режалаштирган. Воқеа юзасидан “Терактга тайёргарлик кўриш ва террорчилик ташкилоти фаолиятида иштирок этиш”  моддаси бўйича жиноий иш қўзғатилган”, дейилади хабарда.

Эслатиб ўтамиз, 2024 йил 22 март куни кечқурун Москва яқинидаги Красногорск шаҳрида жойлашган “Крокус Сити Ҳолл” концерт залида концерт олдидан  содир этилган теракт юзасидан тергов якунланганлиги ҳақида хабар берилган эди.

Бунёд Келдибоев