Москва аэропортларида юқори теракт хавфи эълон қилинди

Россиянинг Москва, Санкт-Петербург ва авиакомпаниялар аэропортларида биринчи марта террорчилик ҳужумлари таҳдидининг учинчи, максимал даражаси жорий этилди. Бу ҳақда "Известия" нашри Ространснадзорнинг авиаташувчилар ва ҳаво портлари ҳамда авиация саноатидаги суҳбатдошларга йўлланган хатига таяниб хабар берди.

"10 ноябрдан бошлаб аэропортлар учун транспорт комплекси фаолиятига террористик хусусиятга эга бўлган, 3-сонли хавфсизлик даражасига тўғри келадиган ноқонуний аралашиш ҳаракати содир этиш билан бевосита таҳдид қилиш даражаси белгиланди. Россияда транспорт воситалари учун хавфсизликнинг уч даражаси ҳукуматнинг 2344-сонли қарори билан белгиланади", дейилади Марказий Федерал округи давлат авиация назорати ва транспорт хавфсизлигини назорат қилиш департаменти раҳбари вазифасини бажарувчи Ираклий Меладзе томонидан имзоланган мактубда.

Унга кўра, биринчи даража транспортга ноқонуний аралашув акти таҳдиди билан жорий этилади; иккинчиси - бевосита хавф мавжудлигини назарда тутади, учинчиси тўғридан-тўғри таҳдидлар билан киритилади.

Биринчи даража доимий, иккинчи ёки учинчи даража 15 кундан ортиқ бўлмаган муддатга ўрнатилиши мумкин.

Нашрнинг йирик авиакомпаниядаги суҳбатдошининг фикрича, Москва аэропортлари ва Пулководаги хавфсизликнинг учинчи даражаси 25 ноябрдан кейин узайтирилади.

Ространснадзорнинг мактубида авиакомпанияларга таҳдиднинг максимал даражасига мос келадиган қўшимча хавфсизлик чораларини кўриш зарурлиги ҳақида хабар берилган.

"Шереметьево ва Домодедово зарур ҳимоя даражасини сақлаб қолишларини айтди. Худди шундай чоралар Пулковода ҳам жорий қилинган. Аэропорт барча транспорт ва авиация хавфсизлиги чораларини тўлиқ бажармоқда", дейди йирик авиакомпаниядаги манба.

Авиакомпаниялар экипажларига, хусусан,  ташиш учун бегона одамлардан ҳар қандай пакет ва буюмларни қабул қилиш тақиқланган. Шереметьевода октябрь ойи охирида ҳудуд бўйлаб қўшимча бетон блоклар ўрнатиш бошланган, аэропорт режимини назорат қилувчи қўриқчиларга “дубинка” берилган ва улардан қандай фойдаланиш ўргатилган. Пулковода йўловчилар самолиётга чиқишда металл детекторлари билан текширила бошланган.

Маълумот учун, Россияда ҳар бир хавфсизлик даражаси бўйича қўшимча чора-тадбирлар ҳукуматнинг 1605-сонли қарори билан белгиланади. Максимал хавф даражасини эълон қилганда, аэропортлар, масалан, тезкор жавоб бериш гуруҳлари ва транспорт хавфсизлик кучлари сонини кўпайтириши, қоидабузарларни аниқлаш бўйича қўшимча чоралар кўриши, бир марталик рухсатномаси бўлган одамларнинг транспорт сектори ҳудудига киришига йўл қўймасликлари ва бошқа чора-тадбирларни амалга ошириши керак.