Мирзиёев ва Тўқаев Қорақалпоғистон масаласида гаплашиб олдилар

Қозоғистон Республикаси Президенти Қосим-Жомарт Тўқаев бугун, 4 июль куни Ўзбекистон Республикаси Президенти Шавкат Мирзиёев билан телефон орқали мулоқот қилди. 

Қайд этилишича, суҳбатдошлар икки томонлама ва минтақавий кун тартибидаги масалаларни муҳокама қилган. 

“Қосим-Жомарт Тўқаев Ўзбекистон раҳбариятининг Қорақалпоғистонда барқарорликни таъминлашга қаратилган қарорлари ўз вақтида қабул қилинганини таъкидлади. Қозоғистон Президенти Шавкат Мирзиёевга Конституцияга ўзгартиришлар киритиш бўйича референдум ўтказишда муваффақият тилади ва бу воқеа қардош Ўзбекистонда кенг кўламли сиёсий ва ижтимоий-иқтисодий ўзгаришлар дастурини амалга оширишда муҳим лаҳза бўлишини айтди”, дейилади хабарда. 

Шунингдек, Давлат раҳбарлари Қирғизистонда бўлиб ўтадиган Марказий Осиё давлатлари раҳбарларининг Маслаҳат учрашуви кун тартибини ҳам муҳокама қилган.

Олий даражада эришилган келишувларни амалга ошириш, шу жумладан саноат, қишлоқ хўжалиги, транспорт, логистика, маҳсулотларни ўзаро етказиб бериш соҳаларида кооперация лойиҳаларини илгари суришга алоҳида эътибор қаратилган.

Эслатиб ўтамиз, кеча, 3 июль куни Қозоғистон Ташқи ишлар вазирлиги Нукусда содир бўлган воқеаларга муносабат билдириб, Ўзбекистон раҳбариятининг Қорақалпоғистон Республикасидаги вазиятни барқарорлаштиришга қаратилган қарорларини олқишлаши ва қўллаб-қувватлашини маълум қилганди.