Мирзиёев Сума Чакрабарти билан ЖСТга аъзо бўлиш жараёнини муҳокама қилди

Бугун, 23 июнь куни Ўзбекистон Президенти Шавкат Мирзиёев иқтисодий тараққиёт, самарали бошқарув ва халқаро ҳамкорлик масалалари бўйича ўзининг маслаҳатчиси Сума Чакрабартини қабул қилди.

Суҳбат давомида Жаҳон савдо ташкилотига аъзо бўлиш юзасидан музокаралар жараёни ҳамда Халқаро тижорат суди фаолиятини йўлга қўйиш бўйича кўрилаётган чора-тадбирларнинг бориши муҳокама қилинган. Шунингдек, Ўзбекистонда инвестиция ва ишбилармонлик муҳитини янада такомиллаштириш масалаларига алоҳида эътибор қаратилган.

Бундан ташқари, мамлакатдаги ижтимоий-иқтисодий ислоҳотлар дастурининг устувор йўналишлари, шу жумладан, соғлиқни сақлаш, таълим, сув таъминоти соҳаларидаги янгиланишлар кўриб чиқилган.

Маълумот учун, Сума Чакрабартини нафақат Шавкат Мирзиёев, балки Қозоғистон Президенти Қосим-Жомарт Тўқаевнинг ҳам маслаҳатчиси саналади. У 8 йил давомида Европа тикланиш ва тараққиёт банкига раҳбарлик қилган.

Эслатиб ўтамиз, шу йилнинг май ойида Самарқандда бўлиб ўтган Европа тикланиш ва тараққиёт банки Бошқарувчилар кенгашининг 32-йиллик йиғилишида Бош вазир ўринбосари Жамшид Хўжаев Ўзбекистон ЖСТга аъзо бўлиш бўйича барча техник ишларни якунлаганини маълум қилганди. Июнь ойида эса Ўзбекистон  Президентининг Жаҳон савдо ташкилоти масалалари бўйича махсус вакили лавозими жорий этилди.